VOV4.K’ho- Ngai do (07/7), ală cau pơrlòng tàm gùt lơgar ngan ngồn mut tàm dơ̆ pơrlòng jơh bơsram kâp 3 nam do mờ môn pơrlòng Ngữ văn jat broă lơh cih jơnau, tơngai lơh jơnau pơrlòng 120 phuk. Ƀùi mho, pơrlòng môn Toán. Gùt lơgar geh 63 Mpồl duh broă pơrlòng mờ 2 rbô 243 anih pơrlòng. Geh 38 nă cau pơrlòng là F0 tus bal pơrlòng.

Jat jơnau yal mhar bơh Ƀộ Giáo zụk mờ Đào tạo dê, kờp tus 8 jơ 30 phuk mang ngai 06/7, neh geh rlau 989 rbô nă cau pơrlòng tus ală anih pơrlòng tàm gùt lơgar lơh sră tus bal pơrlòng, gam rlau 10 rbô nă cau ờ hềt lơh sră tus bal pơrlòng. Tàm drim do, ală cau pơrlòng pơn jat tai lơh sră tus bal pơrlòng lài mờ tŭ pơrlòng môn sơn rờp bơh dơ̆ pơrlòng dê là môn Ngữ văn. Ƀộ Giáo zụk mờ Đào tạo pà git, pơndrờm mờ dơ̆ pơrlòng nam lài, pơrlòng nam do Ƀộ geh 2, 3 bơta tam gơl bè kỹ thuật tàm broă lam lơh pơrlòng nàng kờñ tơrmù ƀà bơta blac pơr lồm tàm tŭ pơrlòng. Bè hơ̆ den tàng, ală cau pơrlòng pal lơh jat di kơrnuat pơrlòng mờ jơnau pơlam bơh cau sền pơrlòng dê. Jơnau ai pơrlòng nam do geh tơrgùm jơnau git wă bal mờ kung geh bơta tam cah, bơh hơ̆ gơtùi tam pà cau pơrlòng, di mờ jơnau sồr bơh uă hìu bơsram đại họk dê ngui điểm pơrlòng nàng sac rơ wah cau bơsram.

Cau mblàng K’Duẩn