Pơn jăt tai broă Pơrjum dơ̆ 6, ngai do (30/10) Quốk hội mŭt tàm poh lơh broă dơ̆ 2. Tàm ngai do, ală kwang bàng Quốk hội cri bơyai tàm hìu pơrjum dờng bè broă lơh jăt ală Nghị quyết bơh Quốk hội bè ală broă lơh jơnau kờñ dà lơgar dê bè bơ̆t bơtàu ƀòn lơgar pa tơngai bơh nam 2021 tus 2025, tơmù rơƀah kơl jăp tơngai bơh nam 2021 tus 2025, bơtàu tơnguh lơh sa mpồl bơtiàn tiah làng bol kòn cau mờ tiah kơh bơnơm tơngai bơh nam 2021 tus 2030.

Tus lồi nhai 8 nam do, kờp jơh priă bơcri dà lơgar geh tă bơh 3 broă lơh jơnau kờñ dà lơgar là 16 rơbô 300 tơmàn đong, geh mờr 48% broă rơndăp geh ai. Priă geh ai ờ hềt di pal pơn drờm mờ jơnau kờñ, jơnau geh ai; tam pà priă bơcri bơtàu tơnguh kes priă dà lơgar lơyài (quý II nam 2022 pa jào); khà priă càn lài bơh ală càr, ƀòn dờng ờ hềt di pal. Tơmù rơƀah ờ hềt geh di jăt mờ jơnau kờñ geh ai uă bơta, kơl jăp, tàm hơ̆ uă ngan là tàm tiah làng bol kòn cau, tiah kơh bơnơm. Phó Thủ tướng Cíñ phủ ồng Trần Lưu Quang pà git: Cíñ phủ ai geh jơnau mờ Quốk hội tam gơl priă bơh nam 2023 tus nam 2024 mờ hòi jà ală càr, ƀòn dờng ờ mìng tă jơh priă mờ bơta kơl jăp broă lơh pal gàr niam.