Jăt jơnau kờp dŭ, Quốk hội geh ring bal Adăt ù tiah (tam gơl) tàm pơrjum do. Mơya, tus tŭ do, rơndăp broă lơh Adăt Ù tiah (tam gơl) kung gam geh uă jơnau đơs ờ ndrờm bal, tàm hơ̆ uă ngan là kơrnoăt toh ù tài bơta kwơ dà lơgar, mpồl bơtiàn; bè broă tam gơl gơnoar ngui ù lơh sa suơn sre, tàm hơ̆ uă ngan là ù lơh kòi; bè gơnoar bal mờ kơnòl bè ngui ù lơh hìu ơm bơh cau lơgar Việt Nam ơm kis hờ lơgar bơdìh; ha là gùng dà broă lơh lơh nền giă ù…

Kung tàm drim ngai òr (03/11), ală kwang bàng neh pơgồp bal jơnau đơs bè broă rơndăp ù tiah, broă ngui ù; Bè broă lơh jăt rơndăp broă lơh hìu ơm kă bro, rơndăp broă tơrgùm bal hìu ơm mờ kă bro; broă lơh drơng ala; Bè bơtàu tơnguh, lơh mờ atbồ ù; Bè broă lơh sră dờp ai hìu nhă, cau dùl nă să gam ngui ù ờ geh sră nggal bè gơnoar ngui ù, ờ tìs mờ adăt boh lam bè ù tiah, ờ gơwèt mờ cau jào ù ờ di mờ gơnoar… Uă kwang bàng đơs nền, do là rơndăp broă cih adăt kwơ màng ngan, den tàng pal geh lơh nền nòn tŭ sền wơl mờ ring bal. broă ring bal rơndăp broă cih Adăt do pal geh tà bơta gàr kơl jăp rơndăp broă cih Adăt, di pal mờ jơnau kờñ mùl màl mờ geh cồng nha.