Jăt Nghị quyết, nam 2024, Quốk hội geh bơyai lơh jăt sền dờng rơlao jơh 2 tơngu me broă lơh mờ Quốk hội jào Ủy ƀan Thường vụ Quốk hội bơyai lơh jăt sền dờng rơlao jơh 2 tơngu me ndai. Bơdìh hơ̆ tai, Nghị quyết kung đơs loh, ai bơh tàm broă jăt sền bơh Quốk hội dê mờ bơta geh mùl màl, Ủy ƀan Thường vụ Quốk hội, Hội đồng Zân tộk, ală Ủy ƀan bơh Quốk hội, Mpồl kwang bàng Quốk hội, kwang bàng Quốk hội rơcang lơh, lơh jăt broă jăt sền bơh să tờm, yal cồng nha lơh jăt di jăt kơrnoăt tàm adăt boh lam.

Pơn jăt tai tam gơl pa, jăt sền di, ai tơngŏ loh anih, ai gŏ loh kơnòl bơh mpồl lơh broă, cau dùl nă să bal mờ jơnau sồr tam gơl, bơtơl nàng lơh gơs broă dong kờl adăt boh lam bơh Dà lơgar dê. Ngai òr (09/06), Quốk hội tơrgùm cri bơyai tàm mpồl mờ uă tơngu me kwơ màng; tàm hơ̆ geh cri bơyai bè rơndăp broă cih Adăt boh lam (tam gơl), rơndăp broă cih Adăt Atbồ, sền gàr broă lơh sền gàr dà lơgar mờ tiah ling klàng.