Kwang ătbồ dờng Mpồl cau gơnoar cih Quôk hội dê mơkung là Kwang ătbồ Cơldŭ lơh broă Quôk hội ồng Bùi Văn Cường sền jơnau yal broă lơh rơcăng. Jăt mờ hơ̆, Quôk hội rơ̆p lời 2 ngai mờ nggùl nàng bơyai lơh lùp mờ hơ jơnau lùp. Quôk hội rơ̆p lơh broă lơh jăt sền broă lơh jăt bơh ală anih lơh broă dê gơ wèt mờ 10 kơrnoăt tàm tơngai lơh broă khoă XIV mờ khoă XV bè jăt sền mìng dùl tơngume mờ lùp mờ hơ jơnau lùp. Đơs tàm dơ̆ lơh broă, Thủ tướng Cíñ phủ ồng Phạm Minh Chính jờng rơ ngan broă lơh rơcăng bơyai lơh ală dơ̆ lùp mờ hơ jơnau lùp tàm pơrjum dơ̆ 06, Quôk hội khoă XV.

Bơh tàm lùp mờ cribơyai tàm dơ̆ lơh broă do dong jòi bàn gùng dà lùp mờ hơ jơnau lùp cồng nha ngan rlau jơh, bơh hơ̆ pơgồp bơnah tơnguh uă broă lơh gơtùi, cồng nha lơh broă mờ bơngă pin dờn bơh Quôk hội dê. Củ tịc Quôk hội ồng Vương Đình Huệ pà gĭt, bè gùng dà rơ̆p bơyai lơh lùp mờ hơ jơnau lùp jăt 4 mpồl gah broă: Lơh sa tơrgùm bal- lơh sa dờng; lơh sa gah broă lơh; niam chài, mpồl bơtiàn; sền gàr adat boh lam, sền gàr cíñ trị tàm dơlam is, kờp sền tă mờ ngui priă jền Dà lơgar dê. Tơngai lời ai tơl mpồl gah broă in pơgăp 160 phuk tus 170 phuk, mơya tŭ đơng lam rơ̆p lơh jăt broă gơlik geh ngan ngồn.