Ià tàm tê cồng nha xét nghiệm mhàm, điện tim, siêu âm tơnơ̆ dơ̆ kham pràn kơl dang să jan bơh mpồl ală ƀák sĩ Hìu sơnơm Nội tiết Dà lơgar dê lơh tàm Tiah 4 Ling dà lềng, Phạm Thị Thoa, pơ ùr dùl nă kwang bàng gam lơh broă tàm Tiah 4 Ling dà lềng gơ lơh iang nùs rlau tơn. Pơgap mờ do 5 nhai, kơnờm geh kham sac rơwah bơh mpồl ƀák sĩ Dà lơgar pơgồp bal mờ ling klàng lơh sơnơm bơh Mpồl sơm kòp 486 dê, Tiah 4 Ling dà lềng mờ Thoa gĭt là geh u tuyến giáp ác tíñ, tơnơ̆ tŭ geh reh mờ sơm kòp, pràn kơl dang bơh Thoa dê neh pràn kơl dang rlau. Phạm Thị Thoa, đơs:“Bè ờs den sùm pal lòt kham ngài ngan, tŭ do ală ƀák sĩ tàm hìu sơnơm rê tàm do kham mìng roh 1 ƀùi lơm, bè ờs den là pal roh jơh màng poh tơn. Broă lơh bơh ală ƀák sĩ dê tus tàm do geh kwơ uă ngan, dong uă ai làng bol Khánh Hòa tàm tiah do in”.

Tàm ală ngai bơyai lơh kham pràn kơl dang să jan, Trung tá Nguyễn Hữu Nhất, atbồ ling klàng lơh sơnơm Sư đoàn 377, Quân chủng ling sền gàr tềng hơđang kơl wàng trồ ling rơndeh par ndrờm bal mờ mpồl ling geh mat bơh gờñ ngan tàm Mpồl sơm kòp 486 dê. Trung tá Nguyễn Hữu Nhất, đơs: “Bơh kham gah do ală ƀák sĩ jơh nùs ngan, bơto pơlam nền nòn, kwang bàng tàm mpồl ling iang nùs ngan tàm broă lơh mờng chài dê”.

Neh uă nam do, nam lơi, kwang đơng lam bồ Hìu sơnơm Nội tiết Dà lơgar kung bal mờ mpồl lơh broă mờ gĭt nđờ jơ̆t nă ƀák sĩ lam lài gah lơh broă ală cuyên khoa bơh Hìu sơnơm dê mut kham, sơm kòp ai ală kwang bàng, cau ling ală mpồl ling tàm Pôs đồng Ling klàng Cam Ranh mờ làng bol tàm ù tiah Cam Nghĩa mờ kơnhoàl Cam Lâm, càr Khánh Hòa in. Ngan là tàm nam 2023, Hìu sơnơm neh dong kờl lơh Cơl dŭ kham kòp dờng, Hìu sơnơm Lữ đoàn 101, Tiah 4 Ling dà lềng tàm xã Cam Thành Bắc, kơnhoàl Cam Lâm. Tus tŭ do, cơl dŭ kham kòp bơh Hìu sơnơm Lữ đoàn 101 dê neh gơ gơs tiah kham kòp pin dờn mờ kwang bàng bal mờ làng bol tàm ù tiah do dê pah tŭ gơbàn kòp tê jê să. Cao Quốc Khánh là làng bol ơm tàm xã Cam Bình, ƀòn dờng Cam Ranh đơs: “Ƀák sĩ tàm do kung jơh nùs ngan sơl, dong kờl ai cau kòp in, sơñio tơl cơldŭ, tơl bơta, nhai lơi añ kung lòt đo gùng mhàm. Tŭ gĭt Lữ đoàn 101 geh hìu sơnơm den do là tiah sơn rờp añ tus tŭ geh broă ờ niam bè pràn kơl dang să jan. Tŭ tus tàm do añ iang nùs ngan”.

Bơh broă lơh bơh chờm gam ờ hoan geh ngan, mờ khà cau kòp pah nam mìng geh pơgap 3 rơbô nă cau, tơnơ̆ tŭ geh dong kờl bè ờs mờng lơh broă, phan bơna măi mok bơh Hìu sơnơm Nội tiết Dà lơgar, pah nam, Hìu sơnơm Lữ đoàn 101 neh kham, sơm kòp ai 18 rơbô nă cau kòp. Bơdìh mờ hơ̆, ală hìu sơnơm kơnă Dà lơgar neh ai uă ƀák sĩ tus nàng dong kờl broă lơh ờs mờng, tàm jàu măi mok, dong yờ tơnguh uă ai ală y ƀák sĩ tàm Hìu sơnơm in, mờ nùs nhơm lòt bal mờ tam pà bal mờ ală ling Dà lềng Việt Nam gam lơh pôs đồng tàm ală tiah ling dà lềng ngài ngan bơh Dà lơgar dê geh sền gròi niam rlau tai bè gah lơh sơnơm, bơh hơ̆, sơlơ tam klăc tai nùs nhơm tam klăc bal đah ling klàng mờ làng bol Việt Nam dê.