Bơyai lơh drà ràng tơlik geh 380 cơldŭ ràng phan bal mờ bơta tus bal bơh 180 anih, mpồl lơh sa kă bro dê, tàm hơ̆ geh bơta tus bal bơh ala măt 30 càr mờ ƀòn dờng tàm jơh gùt lơgar dê.

Bơyai lơh drà ràng tơlik, yal tơngĭt ală phan bơna OCOP, phan bơna lơh sa mờ măy mok ƀòn lơgar pơnrơ ngan, ală phan bơna mùl gŏ is bơh ală càr, ƀòn dờng dê mờ ală phan bơna drơng broă lơh sa mờ ngui sa. Bơyai lơh drà kung là tiah yal ală cồng nha lơh sa, niam chài- mpồl bơtiàn, ală jơnau tơl pràn bơta pràn, broă dong kờl bơcri priă bơh ală càr tàm tiah do dê. Bơh hơ̆, sơlơ tơnguh tai bơta lơh bal bơtàu tơnguh lơh sa- mpồl bơtiàn đah ală càr tàm dơlam kơnhoàl ù tiah do mờ ală tiah tàm jơh gùt lơgar; dong mpồl lơh sa kă bro, cau bơcri priă tàm tiah do kung bè tàm jơh gùt lơgar tàm tơrbŏ bal, lơh bal, hòi jà kă bro, bơcri priă, chồl tơnguh broă lơh lòt rê kă bro đah ală mpồl lơh sa kă bro tàm dơlam mờ bơdìh kơnhoàl ù tiah do.