Neh rơlao 10 nam do, mơya mò Ngô Thị Minh, 55 sơnam, kis tàm sơnah ƀòn Tân Lập, ƀòn dờng Buôn Ma Thuột kung gam ờ tŭ lơi jai ơ̆t gơhòr dà măt pah tŭ đơs bè dơ̆ gơtìp rềs àr lài do. Là kông ñân lơh broă tàm Kông ty TNHH Tiah kis Đông Phương dê, tŭ gam pơs siồ siă tàm gùng tŭ 3 jơ drim, mò ni sơna gơtìp dùl nơm rơndeh tơm. Rềs àr neh lơh mò Ngô Thị Minh gơtìp roh bàr đah jơng, khà gơtìp sồt să tus 98%. “Tŭ do kờñ lòt lơh broă dùl broă lơh lơi nggui tàm rơndeh chồl mờ tê mơya nggui kung ờ gơtùi sơl, mìng tus 2 jơ là gơlơh tul jơh tàm să. Hơ̆ sồng dơ̆ rơtơs jơng tê tai ờ jai ơ̆t ngan. Tŭ do ală che tơngoh tàm đah đơm neh jơh tăc, geh uă tŭ lòt sơm kòp tàm hìu sơnơm là cau ƀák sĩ ờ gơtùi lơh tai, sơnơm lơh tơmù jê tŭ do kung neh gơtìp lơr sơl, den tàng he mìng kăp sề ơ̆t ơl ală dơ̆ jê mơ”.

Kung gơtìp sồt să tus 98% tơnơ̆ mờ tŭ lơh broă tàm nam 2004 tài bơrtoh mền lơh gùng, ồng Võ Thanh Tùng, kis tàm sơnah ƀòn Tân Tiến, ƀòn dờng Buôn Ma Thuột, là do là kông ñân lơh gùng rơbàng gơwèt Sở Giao thông Vận tải càr Dăk Lăk dê pà git, nàng kis tus ngai do, ồng neh pal sơrlèt mờ git nđờ dơ̆ reh mờ rơlao 100 dơ̆ jing tềng bồ. Moăt jê rơlao, tơnơ̆ mờ tŭ ồng gơtìp rềs àr să jan ờ pràn niam tai, tàm dùl nam tơnơ̆ mờ hơ̆ pơ-ùr ồng neh dô. Kờñ jòi geh phan sa kis tàm dùl ngai, kòn ùr ồng neh pờ dùl hìu tăc phan dềt tàm hìu ơpah, gam ồng den bơtoah ngan geh bơsram broă ceh să: “Dùl tơngai tơnơ̆ mờ dà lơgar sền gròi ai tus hờ Hà Nội bơsram broă ceh să sơm kòp, den priă geh tàm rài kis kung geh đao. Tŭ do ơm kis bal mờ kòn, hìu đam den ờ geh, mờ bơta pràn să jan ờ geh sơl, tŭ gơtìp tam gơl trồ tiah den jê ngan”.

Jăt jơnau yal bơh Sở Lao động, Thương ƀiñ mờ Xã hội càr Dăk Lăk yal, tŭ do gùt càr geh rơlao 12 rơbô hìu, mpồl lơh sa kă bro dan cih măt kă bro mờ kờp jơh khà cau lơh broă di pơgăp 120 rơbô nă. Geh uă ngan ală mpồl lơh sa kă bro tàm càr geh broă lơh bơh di mơ mờ dềt, lơh broă tàm ală gah kă bro, broă lơh drơng ala, lơh sa...

Ồng Nguyễn Quang Thuân, Phó Kwang atbồ Sở Lao động, Thương ƀiñ mờ Xã hội càr Dăk Lăk pà git, ală nam pa do, broă gàr kloh niam lơh broă tàm ală mpồl lơh sa kă bro neh geh sền gròi rơlao, ală bơta lơh broă ngai sơlơ geh lơh tơl niam. Mơya broă di gơlan gơtìp bè rềs àr lơh broă kung gam di gơlan geh. Mìng kờp is nam 2022 tàm càr Dăk Lăk neh gơtìp 07 dơ̆ rềs àr lơh broă lơh 07 nă cau gơtìp chơ̆t.

Nàng tơmù ờ uă ngan rềs àr lơh broă, UɃÑZ càr Dăk Lăk neh tơlik Broă rơndăp lơh jăt broă kloh niam lơh broă tơngai bơh nam 2021 tus 2025. Lơh ngan tus nam 2025, pah nam gơmù 4% bơta gơtìp rềs àr lơh broă lơh gơtìp chơ̆t cau; gơguh tai 5% khà cau lơh broă geh kham kòp broă lơh mờ 5% khà anih lơh broă geh sền gròi tiah lơh broă... Ồng Nguyễn Quang Thuân pà git: “Bè broă lơh mùl màl den lài ngan tơnguh broă yal mblàng, bơdìh mờ broă yal mblàng mờ pano, áp phíc, pang sră pal lơh pràn broă bơyai bơto ai cau lơh broă mờ cau ngui cau lơh broă in; dơ̆ bàr là sền wơl ală broă lơh, kơrnoăt lơh broă tàm anih lơh broă ƀuơn gơtìp rềs àr lơh broă, tàm hơ̆ pal sền kwơ tus mờ gah lơh sa kă bro, lơh gơs phan ngui sa, bơ̆t bơtàu dan pal geh tơngai lơh broă mùl màl tàm broă tơmù rềs àr lơh broă; Lơh jăt ală broă lơh mờ ai geh bơta niam tiah lơh broă cau lơh broă in bè sền gròi tiah lơh broă nàng gàr niam bơta git gơ̆p ring bal, kơl jăp”.

Ală bơta rềs àr lơh broă mờ kòp broă lơh ndrờm gơtùi rơcang sơndră di lah cau ngui cau lơh broă sền gròi tus mờ broă lơh niam bơta lơh broă, sền gròi ală bơta di gơlan gơtìp rềs àr, mờ jơh ală cau lơh broă pal lơh jăt kơrnoăt, tơngai lơh, broă lơh broă lơngăp lơngai. Nàng lơh geh bơta do, jơh cau lơh broă mờ cau ngui cau lơh broă pal git loh bè ală bơta di gơlan gơtìp rềs àr kung bè lơh bè lơi nàng tơmù ờ uă ngan rềs àr bơh broă sền gròi is, ai gŏ bơta ngòt rơngơ̆t, gơtìp aniai tàm anih lơh broă, lơh jăt niam broă bơsram tàp, bơto sồr, lơh jăt bè kloh niam lơh broă.