Dơ̆ lòt còp geh lơh bơh ngai 11 tus ngai 13/01/2024. Tơnơ̆ dơ̆ wă rò yŭ rơyùm, Củ tịc lơgar Võ Văn Thưởng mờ Kwang atbồ lơgar Indonesia Joko Widodo lam bồ mpồl kwang bàng kâp dờng 2 lơgar lam lơh pơrjum. Bàr nă kwang đơng lam bồ ring bal, bơh ală cồng nha lơh broă bal dờng màng tàm mờr 70 nam do, pal gờñ ai bơta git gơp lơh broă bal kuơmàng đah 2 lơgar gơguh tus bơta pa.

Củ tịc lơgar Võ Văn Thưởng đơs nền, Việt Nam sùm sền dờng màng mờ kơp kờñ sơlơ tơnguh tai bơta git gơp ờs mờng mờ lơh broă bal kuơmàng mờ Indonesia; nting bơr Indonesia bơyai lơh geh cồng nha dơ̆ tĕ khà mờr tus, pơn jat tai bơtàu tơnguh pràn, tă pơgồp jơh nùs ai ring lơngai mờ lơh broă bal tàm tiah do mờ tàm dunia. Bàr nă kwang đơng lam bồ ring bal sơlơ tơnguh rlau tai ală gùng dà, broă lơh bal 2 gah; mhar bơt bơtàu Broă lơh tơngai bơh nam 2024 tus nam 2028 dipal mờ tŭ tơngai pa. Bàr nă kwang đơng lam bồ kung ring bal, bơh ală cồng nha lơh broă bal dờng màng tàm mờr 70 nam do, pal gờñ ai bơta git gơp lơh broă bal kuơmàng đah 2 lơgar gơguh tus bơta pa. Kwang atbồ lơgar Indonesia tàm drim ngai 12/01 neh tus ơn guàng bơkàu, mut còp gơlăng ƀồc Củ tịc Hồ Chí Minh mờ Anih kah kơlôi ală cau ling khin cha jak chài chơt màng.