Tàm dơ̆ lơh broă, ală jơnau đơs ndrờm ring bal uă ngan mờ broă bơyai lơh pơrjum, đơs tờm do là bơta pa bơh Quốk hội Khoă XV dê, geh kwơ màng ngan, là dùl tàm ală broă lơh nàng Quốk hội, kwang bàng Quốk hội, anih lơh broă làng bol pồ ală tiah jăt sền bơh gờñ, bơh ngài broă bơyai lơh jăt ală adăt boh lam, nghị quyết neh geh Quốk hội ring bal.

Jơnau đơs pơn ŭt dơ̆ lơh broă, Củ tịc Quốk hội ồng Vương Đình Huệ ring bal bè măt sơnđan bơh Pơrjum là “Pơrjum gùt lơgar lơh jăt adăt boh lam, nghị quyết bơh Quốk hội Khoă XV”. Pơrjum geh Ủy ƀan Thường vụ Quốk hội đơng lam bơyai lơh, anih lơh broă pơgồp bal là Cíñ phủ, Mặt trận Dà lơgar Việt Nam, Anih cah rơña làng bol dờng rơlao jơh, Anih sền gròi ai ngui kơrnoăt boh lam dờng rơlao jơh, Kiểm toán Dà lơgar bal mờ ƀòn dờng Hải Phòng-do là tiah geh bơyai lơh pơrjum. Pơrjum geh bơyai lơh jăt broă lơh tơn pơgồp bal mờ pờ tơlik tàm internet tàm 1 ngai.