Geh rơlao 100 hìu ràng tăc phan tus bơh 39 mpồl lơh sa ka bro bơh càr Sơn La mờ ală càr: Hưng Yên, Ninh Bình, Yên Bái, Hà Nội, Dăk Lăk, Gia Lai… mờ uă bơta phan geh lơh bơh kơphe, phan geh lơh bơh broă lơh sa suơn sre, phan bơkah bơh tàm ală tiah neh tơrgùm tus bal tàm Lơh chờ ràng tơlik “Kơphe Sơn La – Tơrgùm mờ bơtàu tơnguh”.

Tàm bơta niam bơh Lơh chờ dê, cau lơh kơphe bal mờ cau hùc dà kơphe neh tơrgùm, tìp bal tàm ală bơnah pơrlòng bè: bơka kơ ƀàng tăc dà kơphe niam, bơka li kơphe, klài dà kơphe mờ phan geh lơh bơh tê dê bal mờ wăc rùp mờ ƀòk kơphe neh klài… Làng bol, cau năc lòt nhơl geh hùc ală li kơphe ờ sa priă mờ geh tus bal tàm ală jơnau yal bè tờm kơphe bơh brê bơnơm Sơn La, tiah hờ đah tô măt tơngai mŭt dà lơgar dê. Lơh chờ kơphe càr Sơn La mờ uă broă lơh niam neh lời wơl geh bơta niam tàm nùs nhơm cau năc lòt nhơl rềp ngài in, là broă lơh geh ai tơngŏ geh mờr 80 nam lơh kơphe càr Sơn La bơh bơta phan tam geh lơh gơguh rài kis tus mờ khà măt kă bro phan bơkah lik tus dunia, geh kờñ ngui uă lơgar bal mờ ù tiah dà lơgar dê.