Jăt rơndăp broă bơh Ƀộ Nông nghiệp mờ Phát triển Nông thôn dê yal, tus bồ nhai 3 tus, Rơndăp broă lơh bơtơ̆t rơbòng dà 4 rơbô 400 tơmàn đơng Krông Păc thượng geh lơh tàm càr Dăk Lăk geh pal bơ̆t ù nàng bơ̆t dà. Rơndăp broă lơh do nàng ai dà tuh di pơgăp 15 rơbô lồ ù lơh sa suơn sre tàm ală kơnhoàl hờ đah măt tơngai lik càr Dăk Lăk in. Mơya, tus tŭ do, broă tơm ntrờn ù tiah kung gam ờ hềt lơh gơs, gam 488 hìu làng bol kis tàm tiah tơnao dà.

Tŭ do, UɃÑZ kơnhoàl Mdrăk, càr Dăk Lăk gam pal mhar bơyai lơh rồn bơklơn ntrờn làng bol. Broă rồn bơklơn ntrờn 488 hìu làng bol geh lơh jăt rơndăp broă bơh UɃÑZ kơnhoàl Mdrăk nàng drơng tàm rơndăp broă lơh tơnao dà lơh bơtơ̆t rơbòng dà Krông Păc thượng in – do là broă lơh tă tus 4 rơbô 400 tơmàn đong neh gơtìp lơyài jăt mờ tơngai geh ai lơh tàm uă nam, tài gam uă hìu ờ hềt lơh jăt mờ gùng dà broă tơm ntrờn, dong kờl, tus tàm ƀòn ơm kis pa, tiah lơh broă sa pa. Phan bơna tàm tiah lơh ƀòn ơm kis pa ờ hềt lơh gơs mờ ù tiah lơh sa ờ hềt geh ai tơl là tơngu me tờm lơh làng bol ờ ring bal. Broă tơm ntrờn ù tiah, tàm khà 742 hìu làng bol tàm tiah geh rơndăp broă lơh, tus tŭ do, mìng rơ̆p geh 254 hìu ntrờn tus tàm ƀòn ơm kis pa. Jơh ală hìu làng bol geh ntrờn tus tàm ƀòn ơm kis pa sồ 2, gơwèt xã Cư̆ Bông, kơnhoàl Ea Kar.