Jat jơnau yal bơh Tỉñ Đoàn càr Dăk Lăk dê, tàm 6 nhai nam do, rơnàng kơnòm să gùt càr neh bơyai lơh jat geh rlau 4 rơbô broă lơh, bơnah broă ơruh pơnu mờ kờp jơh priă lơh geh 7 tơmàn 200 tơlak đong.

Ngan là, ală kấp ƀộ Đoàn tàm jơh gùt càr neh lơh 17 nơm hìu kờñ gơboh kòn bơnus, hìu khăn quàng pơrhê; lơh 17 kơi sồ broă lơh Sòl àng gùl ƀòn lơgar, 23 tiah nhơl ñiŏ ai kơnòm dềt in; dong kờl uă tùh sră ai kơnòm dềt in; sơng mờ lơh niam wơl gĭt nđờ nơm hìu niam chài, hìu mpồl bơtiàn. Ală broă lơh “Ngai dơ̆ poh dong kờl is”, “Ngai rlô tơlir gùt lơgar” geh bơyai lơh dùl ròt bal, gơ hòi gơ jà uă ngan đoàn viên, ơruh pơnu tus bal mờ broă lơh sền gàr tiah ơm kis, sơndră mờ tam gơl trồ tiah tàm ală tiah. Ală kấp ƀộ đoàn gùt càr neh jàu pà rlau 20 rơbô bơnah phan sa, mờr 3 rơbô bơnah priă bơsram, rơndeh coh ai làng bol mờ kơnòm dềt in; lam kham sơm kòp ờ sa priă tàm ală tiah sar lơgar ngài. Kờp jơh khà priă lơh ală broă lơh dong kờl is là rlau 10 tơmàn đong.

Bi H Giang Niê, Ƀí thư Tỉñ đoàn càr Dăk Lăk đơs: “Bơdìh mờ broă bơyai lơh is, rah rài tơl broă lơh den đah ală kấp ƀộ đoàn geh bơta pơgồp bal mờ gơ̆p. Ai gơ wèt mờ kấp càr den bol añ gơ jal ngan hòi jà uă ngan rlau jơh bơta sền gròi dong kờl bơh ală Kông ty dờng, Tập đoàn nàng hòi jà rê tàm ù tiah krơi is bơh ală càr tàm tiah Tây Nguyên dê. Den là ală broă lơh dong kờl geh lơh jat di broă, di anih, tơrgùm tàm broă bơt bơtàu ƀòn lơgar pa, tiah drà ngăc ngar. Ală bơnah broă den tơrgùm tàm broă tam gơl broă lơh nàng mut lơh ngan ngồn mờ geh ngan rlau tai”.

 Tàm càr Kon Tum, lơh jat niam gơ noar broă lam lài, dong kờl is, bơta pràn bơceh lơh bơh ơruh pơnu dê, bơh bồ nam tus tŭ do rơnàng kơnòm să càr dê neh lơh ngan tus bal lơh ală broă lơh, bơnah broă pơgồp bơnah lơh sir kơnòl broă cíñ trị, kơnòl broă ờs mờng mờ tus bal bơtàu tơnguh lơh sa- mpồl bơtiàn. Bi A Xây, Phó Ƀí thư Thường trựk Tỉñ đoàn, Củ tịc Mpồl tam klăc Ơruh pơnu Việt Nam càr Kon Tum dê, pà gĭt: “Nàng lam lơh jat geh cồng nha uă ngan rlau jơh, Ƀan Thường vụ Tỉñ đoàn càr Kon Tum neh kờp sền, lơh ngan ngồn jơh ală broă lơh bơh chờm nàng lam lơh jat tàm nhai 3 Nhai Ơruh pơnu dê. Bơto pơlam ală broă lơh, tơngume geh gơrềng tus tam gơl sồ nàng tàm jàu bơta chài ngui măi mok pa ai đoàn viên ơruh pơnu in mờ ngan là mŭt lơh tàm tiah sar lơgar ngài, tiah làng bol kòn cau dùl ết nă cau in”.

Tỉñ Đoàn càr Gia Lai kung pa bơyai lơh sền wơl 3 nam bơt bơtàu mờ rề ơnàng cau pơn rơ jak tàm broă lơh Đoàn mờ srơh ơruh pơnu, kơnòm pa tàu mờ kơnòm dềt càr Gia Lai dê mờ jờng rơ Ơruh pơnu pơn rơ jak ngan lơh jat jơnau sồr bơh Bác Hồ dê nam 2023.

3 nam do, ală kấp ƀộ Đoàn- mpồl tàm jơh gùt càr Gia Lai neh sền gròi, lơh pràn ală broă lơh bơto bơtê bơhiàn kăc màng, nùs nhơm kờñ gơboh dà lơgar, bơto nùs nhơm, rài kis niam chài ai ơruh pơnu, kơnòm pa tàu mờ kơnòm dềt in. Tỉñ đoàn càr Gia Lai neh lam lơh dơ̆ hòi jà “Pah ngai dùl jơnau niam, pah poh dùl jơnau yal niam” tàm internet, sền gŏ mờ jờng rơ 27 nă cau krơh niam “cau niam, broă niam” tàm Đoàn viên, ơruh pơnu dê.

 Lơh jat Cỉ thị sồ 05 bè “Lơh pràn bơsram mờ lơh jat bồ tơngoh, nùs nhơm, rài kis mờ broă lơh Hồ Chí Minh dê”, Ƀan Thường vụ Tỉñ Đoàn càr Gia Lai neh sền gròi lam lơh broă bơsram, lơh jat jơh tàm tơl broă lơh bơh mpồl Đoàn dê. Bơh broă lam lơh, neh geh uă krơh niam pơn rơ cau jak chài, jơh nùs, sơr lèt gan kal ke mut sơnđờm lơh broă, gàr kơ̆ lơngap lơngai cíñ trị, tài rài kis ring lơngai bơh làng bol dê, bơt bơtàu ƀòn lơgar pa. Pơn đơl pràn lơh ngan tàm tơngai tus pơn jat tai lơh pràn ală srơh tàm pơrlòng kờñ gơboh dà lơgar, lam lài tus bal bơtàu tơnguh lơh sa- mpồl bơtiàn. Là dùl tàm ală cau dùl nă să jak ngan geh jờng rơ Ơruh pơnu jak ngan lơh jat jơnau sồr Bác Hồ dê, mờ dờp ƀằng khen bơh Ủy ƀan Ñân zân càr Gia Lai, bi Nay Wing, Ƀí thư Huyện đoàn kơnhoàl Chư Sê, đơs: “Ngai do añ chờ hờp ngan, tàm tơngai tus rơ̆p geh ală kơnòl broă tờm, lơh ngan ngồn tus mờ đoàn viên ơruh pơnu in nàng lơh sùm, lơh jat niam nàng geh ală cồng nha uă rlau tai. Añ rơ̆p là cau lòt lài, lam lài tơl ală broă nàng lơh krơh ai ală đoàn viên ơruh pơnu in. Sơlơ mblàng yal, hòi jà ơruh pơnu bè ală gah broă bè yal tơngĭt bơto bơtê adat boh lam, lơngap lơngai gùng lòt, lơh geh ală bơta nàng ơruh pơnu in gĭt tus mờ priă càn, bơsong broă lơh, sơlơ lơh geh priă jền nàng gàr niam kơ̆ kơl jap rài kis”.

Cih dờp bơta tă pơgồp bơh rơnàng kơnòm să càr dê, Củ tịc Ủy ƀan Ñân zân càr Gia Lai neh pà ƀằng khen ai 6 mpồl cau mờ 10 nă cau dùl nă să in tài bơh geh cồng nha jak ngan tàm broă bơt bơtàu mờ rề ơnàng krơh niam cau pơn rơ jak tàm broă lơh Đoàn mờ srơh ơruh pơnu, kơnòm pa tàu mờ kơnòm dềt càr Gia Lai dê. Ƀan Cấp hàñ Tỉñ đoàn càr Gia Lai kung jàu pà ƀằng khen ai 75 nă krơh niam ơruh pơnu jak ngan lơh jat jơnau sồr Bác Hồ dê nam 2023.