Bă ù Dà Làc kung geh rề ơnàng gơguh tus 9 dơ̆ pơndrờm mờ tŭ do. Dơ̆ pơrjum dơ̆ 19, Mpồl duh broă Làng bol càr Lâm Đồng khoă X geh lơh tàm ngai 04/10 neh pờ tê ring bal sră wăc rùp ù tiah tam gơl wơl Rơndăp ù tiah bal ƀòn dờng Dà Làc mờ kơnhoàl ù tiah rềp bal tus nam 2045. Tam gơl wơl do nàng kờñ lơh geh jơnau kờñ tŭ do mờ tơnơ̆ do bơh ƀòn dờng dê, kung bè bơsong ală jơnau ờ hềt dipal, ờ hềt niam bè gơkòl gùng lòt rê, ù tiah tiah drà gam gơtìp ờ lơh jăt rơndăp ù tiah, ngan là tàm tiah tờm ƀòn dờng Dà Làc dê. Jăt Sră wăc rùp ù tiah tam gơl wơl, bơnah lơh rơndăp ù tiah geh jơh ală nhàr ù tiah gơnoar ătbồ ƀòn dờng Dà Làc mờ ală kơnhoàl: Lạc Dương, Đơn Dương, Đức Trọng, mờ dồ bơnah kơnhoàl Lâm Hà dê geh bơta kơh jơnhoa pơndrờm mờ măt dà lềng rlau 850 thơk, mờ kờp jơh bă ù geh is rlau 336 rbô lồ. Tàm hơ̆, tiah ơnàng gùt dar geh gơrềng geh tai kơnhoàl Dam Rong.

Sră wăc rùp ù tiah tam gơl wơl jơh ală bơta do lơh jăt ngan ngồn ală broă rơndăp lơh, pơlam gùng bơtàu tơngguh bơh Rơndăp ù tiah bơ̆t bơtàu tiah càr Lâm Đồng, lơh geh jơnau kờñ ătbồ mờ bơtàu tơngguh lơh sa- mpồl bơtiàn, niam chài- ù tiah tiah drà- hìu đam ù tiah ƀòn dờng Dà Làc mờ tiah rềp bal. Mơkung ngui geh cồng nha bơta geh brê bơnơm geh is, ală ƀòn brê bơnơm mùl gŏ is bơh ƀòn dờng Dà Làc dê nàng bơtàu tơngguh ƀòn dờng pa, geh rài kis niam chài krơi is, lơh gơlik bơta pràn lơh gơkờñ bơh tiah drà dê, rơhời bơtàu tơngguh bơta niam tiah drà.