Tàm tơnggume broă lơh tus bal Pơrjum Kwang bàng kâp dờng dà Tây dơ̆ 19 mờ còp ngan ngồn lơgar Kộng hoà Tây bơh ngai 03 tus ngai 07/10/2024, drim ngai 04/10, jăt jiơ tiah do dê, tàm Paris, Tổng Ƀí thư, Củ tịc lơgar Việt Nam ồng Tô Lâm neh wă Củ tịc Ala măt bơh Mpồl Cau ătbồ lơgar Tây, Củ tịc Mpồl ală cau rwah cau lơh broă dà Tây, Củ tịc bơceh lơh Notus Technologies.

Tàm ală dơ̆ tìp măt, Tổng Ƀí thư, Củ tịc lơgar ồng Tô Lâm sồr: Mpồl Cau ătbồ lơgar Tây pơn jăt tai dong kờl mờ mpồl lơh kòn gùng bơcri priă kă bro đah ală mpồl lơh sa kă bro bàr lơgar dê tàm tơngai tus; Đơs nền Việt Nam geh gùng dà gơhòi gơ jà, lơh broă bal geh sac rwah, ai bơta niam, cồng nha, măy mŏk mờ sền gàr tiah ơm kis là broă jàu sền swì tờm. Tổng Ƀí thư, Củ tịc lơgar ồng Tô Lâm đơs nền, Việt Nam hơ rơ̆p lòt bal mờ ai tơl bơta ƀươn ngan rlau jơh nàng ală mpồl lơh sa kă bro bơh Mpồl Cau ătbồ lơgar Tây dê đơs is mờ bơcri priă lơgar ndai đơs bal lơh broă bơcri priă kă bro geh cồng nha mờ lơh gơtùi tàm Việt Nam.