Tơnơ̆ 02 ngai tơlik măt Broă lơh tờm uă bơta yal tơngit, uă broă lơh mờ tơngu me “Việt Nam-Rài brồ guh”, drim òr (04/10), tàm Hà Nội, Kwang geh jơng tàm Đảng Dà lơgar, Kwang atbồ dờng Anih jơnau đơs Việt Nam ồng Đỗ Tiến Sỹ neh tus sền broă lơh jăt mpồl broă lơh do tàm uă mpồl lơh broă bơh VOV dê, tàm hơ̆ geh: Mpồl yal tơngit jơnau gơlik geh pah ngai (VOV1), Mpồl Pờ tơlik jơnau đơs mờ lơgar ndai (VOV5), Ƀăo Điện tử VOV.vn, Anih sơnio rùp Kỹ thuật sồ VTC, Đah Sơnio rùp VOVTV, Đah VOV gùng lòt mờ Ƀăo Jơnau đơs Việt Nam.

Tàm dơ̆ sền, lam lơh, Kwang atbồ dờng Anih jơnau đơs Việt Nam ồng Đỗ Tiến Sỹ đơs loh: Mpồl broă lơh do geh kwơ màng mùl màl di tơnkah 55 nam lơh jăt jơnau nting lời wơl bơh Củ tịc Hồ Chí Minh dê, wèt tus chờ gờm Pơrjum dờng Đảng gùt lơgar dơ̆ XIV, wèt tus tơnkah 40 nam lơh jăt broă lơh tam gơl pa dà lơgar mờ ai tơngŏ rài brồ guh bơh jơi bơtiàn dê. Broă Anih jơnau đơs Việt Nam gờñ tơlik măt mpồl Broă lơh tờm uă bơta, uă broă lơh “Việt Nam – Rài brồ guh” ai tơngŏ broă lơh ngan bơh Anih jơnau đơs Việt Nam dê sùm lòt bal mờ ală gùng dà broă lơh kwơ màng bơtàu tơnguh bơh Đảng mờ Cỉñ phủ dê.