Đơs tàm Cribơyai, Thủ tướng lơgar Campuchia Hun Manet đơs nền rơ̆p pơn jat tai tam gơl pa tiah bơcri priă lơh sa kă bro mờ ală broă lơh tờm, jak chài ngan nàng lơh geh bơta iang nùs ai cau bơcri priă tàm lơgar Campuchia in. Cíñ phủ lơgar Campuchia kung rơ̆p pơnđơl pràn lơh ngan nàng lơh geh bơta ƀuơn ngan rlau tai ai ală cau bơcri priă bơh lơgar ndai in; hòi jà ală cau bơcri priă 2 lơgar sơlơ tơnguh lơh broă bal tàm gah lơh sa mờ bơcri priă bơh dơ̆ bơyai lơh cribơyai, cribơyai kă bro bơcri priă geh jà kwang đơng lam bồ 2 lơgar dê; hòi jà cau bơcri priă lơgar Việt Nam tus bơcri priă tàm lơgar Campuchia uă rlau tai; pơn jờng ală cau bơcri priă lơgar Campuchia bơcri priă tàm lơgar Việt Nam nàng lơh li la uă rlau tai broă lơh lơh sa, kă bro, ală anih lơh gơlik phan bơh he dê.

Bè đah he, Thủ tướng Phạm Minh Chính jờng rơ uă ngan broă bơyai lơh dơ̆ cribơyai; jờng rơ ală kwang bàng tus bal ndrờm jơh nùs tă pơgồp bơt bơtàu bơta lơh bơyô bal mờ lơh broă bal đah 2 lơgar. Gơwèt mờ lơgar Việt Nam kung bè lơgar Campuchia, 2 lơgar rơ̆p lơh geh ală bơta niam ngan rlau jơh ai ală cau bơcri priă in. Thủ tướng hòi jà ală cau bơcri priă tơrgùm tàm tam gơl sồ, lơh sa tàm pơdar, bơcri priă jat tàm khoa họk kông nghệ, tam gơl pa bơceh lơh, bơh hơ̆ tơnguh uă gơnoar broă 2 rài lơh sa dê, tam pà bal mờng chài lơh broă bal, rề ơnàng rlau tai ù tiah ai bơtàu tơnguh in.