Drim ngai 28/11, tàm càr Quảng Ninh, Ủy ƀan Mặt trận Dà lơgar Việt Nam pơgồp bal mờ Mặt trận dà lơgar Lo bơyai lơh sơnđờm mut lơh Tìp mat lơh kwèng đah Ủy ƀan Mặt trận Dà lơgar Việt Nam mờ Mặt trận gùt lơgar Lo mờ Ủy ƀan Mặt trận Dà lơgar 7 càr bơh lơgar Việt Nam mờ Mặt trận 2 càr halà tiah atbồ is bơh lơgar Lo dê geh bal gùng tiah nhàr lơgar, dơ̆ 2 nam 2023. Broă lơh tìp mat lơh kwèng dơ̆ 2 nam 2023 geh kwơ ngan tàm dơ̆ tơngkah kir sơn rai 15 nam lơh bơta gĭt gơ̆p lơh broă bal kwơ màng tơl làm đah 2 lơgar, tàm đòm jat geh cồng nha bơh broă lơh dơ̆ 1 geh bơyai lơh tàm càr Vân Nam, lơgar Lo nam 2019.

 Tàm ƀòn dờng Hạ Long, ală kwang bàng 2 lơgar tus bal Ngai chờ tam klăc dờng jơi bơtiàn bơh ƀòn dờng dê, tus bal ală broă lơh duh hồl ngan cèng bềng bơhiàn bơh yau bơh ală jơi bơtiàn dê tàm do; tus sền ală cơldŭ ràng tăc phan bơna OCOP pơn rơ ngan bơh càr Quảng Ninh dê. Tàm Kông viên Hạ Long, mpồl kwang bàng tam bal 75 nơm tờm lát bơkào, wèt tus tơngkah kir sơnrai 75 nam Ngai lơh bơta gĭt gơ̆p cribơyai broă mờ lơgar ndai đah lơgar Việt Nam mờ Lo (18/01/1950– 18/01/2025).