Kờp dŭ dờp geh pơgap 6 rơbô kơldung mhàm, Dơ̆ lơh chờ phồng dơ̆ do geh jơnau sồr “Pà mhàm bồ nam pa- tơnguh uă tai bơta chờ hờp” bơh Viện Huyết học- Truyền máu Dà lơgar pơgồp bal mờ Mpồl Ơruh pơnu Hòi jà pà mhàm is Hà Nội dê bơyai lơh. Lòt gan 15 dơ̆ bơyai lơh, mờ rlau 100 rơbô kơldung mhàm, Dơ̆ lơh chờ nam pa phồng neh mờ gam đơs nền bơta lơh gơrề uă, lơh kah wơl gĭt nđờ jơ̆t rơbô nùs nhơm kờñ gơboh kòn bơnus tàm mpồl bơtiàn dê, mơkung gơ gơs bơta kơ̆p gơn, chờ hờp bơh gĭt nđờ rơbô nă làng bol kờñ pơgồp dùl broă lơh niam tàm nhai 1 do tơn.

Phó Giáo sư, Tiến sỹ Nguyễn Hà Thanh, Kwang atbồ Viện Huyết học-Truyền máu Dà lơgar pà gĭt, lài mờ tŭ dơ̆ lơh chờ nam pa phồng geh ngan ngồn sơnđờm mut lơh den rlau 2 nhai do, Viện Huyết học- Truyền máu dà lơgar neh dờp geh mờr 60 rơbô kơldung mhàm drơng broă dong kờl mờ sơm kòp lài mờ tam tŭ sa tềp dà lơgar Qúy Mão.