Drim ngai 26/12, tàm Hà Nội, Pơrjum dờng cau ala mat gùt lơgar Mpồl cau lơh broă sa lơgar Việt Nam dơ̆ VIII, tơngai lơh broă bơh nam 2023-2028 sơnđờm mut pơrjum yŭ rơyùm tàm Anih tờm Pơrjum Dà lơgar Mỹ Đình. Tổng Ƀí thư Nguyễn Phú Trọng tus bal mờ geh jơnau đơs đơng lam kwơ màng tàm dơ̆ pơrjum. Mờ tơngume “Tam klăc bal- Làng bol lơh tờm- Bơceh lơh- Lơh broă bal mờ Bơtàu tơnguh” Pơrjum dờng Mpồl cau lơh broă sa lơgar Việt Nam dơ̆ VIII geh bơta geh mat bơh mờr 1 rơbô nă cau ala mat ngan ngồn, ala mat ai rlau 10 tơlak nă cau tàm mpồl, cau lơh broă sa bơh gùt lơgar dê. Tàm pơrjum dờng, ală cau ala mat tơrgùm cribơyai, tă pơgồp jơnau đơs tàm jơnau rcang cih ală sră nggal kwơ màng, tàm hơ̆ geh: Jơnau yal cíñ trị bơh Ƀan Cấp hàñ Mpồl cau lơh broă sa Dà lơgar Việt Nam khoă VII; Jơnau rcang cih Jơnau yal sền is tìs di bơh Ƀan Cấp hàñ Mpồl cau lơh broă sa Dà lơgar Việt Nam khoă VII; Jơnau rcang cih Điều lệ Mpồl cau lơh broă sa suơn sre lơgar Việt Nam (bơtơl, tam gơl). Pơrjum kung cribơyai jơnau lơh nền pơlam gùng dà broă lơh, jơnau kờñ, kơnòl broă ai jơh tơngai lơh broă; pồ Ƀan Cấp hàñ tơngai lơh broă bơh nam 2023-2028. Tàm tơngume Pơrjum dờng kung rơ̆p bơyai lơh 10 dơ̆ cribơyai bơyai mìng dùl tơngume nàng kờñ đơs jơnau bơceh lơh bơsong ală broă dờng geh ai gơwèt mờ broă lơh bơh Mpồl cau lơh broă sa lơgar Việt Nam dê, tơrgùm ală jơnau đơs, jơnau dan nàng tơrgùm wơl, iăt, kơno tàm sră nggal Pơrjum dờng dê.

Đơs đơng lam Pơrjum dờng, Tổng Ƀí thư Nguyễn Phú Trọng sồr, ală kấp Mpồl cau lơh broă sa gùt lơgar pal pơn jat tai tam gơl pa pràn kơl dang rlau tai tơngume, broă lơh, tơnguh uă bơta niam, geh cồng nha lơh broă bơh mpồl dê; bơt bơtàu Mpồl cau lơh broă sa lơgar Việt Nam ngai sơlơ pràn kơl dang kơ̆ kơl jăp, ngan ngồn là mpồl ala mat ai gơnoar, bơta kwơ di mờ adat boh lam, di pal bơh cau lơh broă sa dê; lơh jat gơ in niam gơnoar broă là anih tờm, mpồl cau tờm ngan ai srơh cau lơh broă sa in, là mpồl cau ala măt đah cau lơh broă sa gơwèt mờ Đảng, Dà lơgar; là mpồl lơh broă jơh nùs tàm mpồl tam klăc dờng jơi bơtiàn dê, tam klăc bal “Kông ñân- cau lơh broă sa- mờ cau geh bồ tơngoh gĭt wă”.