Di tơnkah 98 nam Ngai sră ƀăo kác màng Việt Nam, mho òr (16/06), tàm Hìu Quốk hội, Củ tịc Quốk hội ồng Vương Đình Huệ tìp măt kwang đơng lam Ƀan Tuyên giáo Dà lơgar, Ƀộ Thông tin mờ Truyền thông, Mpồl Cau lơh ƀăo Việt Nam, ală cau lơh broă lài do, ala măt kwang bàng đơng lam ală anih lơh broă sră ƀăo là kwang bàng tàm Mpồl sền mờ ai khà Dơ̆ pơrlòng Diên Hồng dơ̆ sơnrờp, kwang đơng lam ờ uă anih lơh broă sră ƀăo tàm Lơgar mờ ală tiah.

Củ tịc Quốk hội ồng Vương Đình Huệ đơs nền, Quốk hội sùm sền gròi lơh gơs bè adăt boh lam, broă lơh gơwèt mờ gah yal tơngit, mblàng jơnau, sră ƀăo. Tàm tơngai tus, Củ tịc Quốk hội ồng Vương Đình Huệ sồr sră ƀăo pal pơn jăt tai gàr kơl jăp bơngă, gơnoar broă nàng là dùl tàm ală mpồl cau tờm kwơ màng, pơgồp bal tàm broă bơceh lơh mờ tam gơl pa Dà lơgar gơnoar adăt boh lam xã hội củ nghĩa Việt Nam, di pal mờ broă tơnguh bơtàu ring lơngai mờ niam bơnĕ bơh rài pa, sền gàr mờ tơnguh bơtàu tơl ală bơta tàm dơ̆ tam gơl pa tơl ală bơta, ndrờm bal, tơrgùm bal mờ dunia mờ Nùs nhơm kơ̆p kờñ ngan lơgar Việt Nam dờng pràn tàm nam 2045.