Củ tịc Quôk hội ồng Vương Đình Huệ đơs nền, lòt gan 98 nam bơt bơtàu mờ dờng pràn, Sră ƀău kac màng Việt Nam bơh Củ tịc Hồ Chí Minh crơng gơs mờ đơng lam bồ neh sùm lòt bal mờ ală gơl gùng tam lơh bơh kac màng dê, tă pơgồp kuơmàng ngan tàm broă lơh bơt bơtàu mờ sền gàr dà lơgar. Tềng đap bồng bi Đảng dê, rài sră ƀău kac màng Việt Nam ngai sơlơ bơtàu tơnguh tơl làm bè tơngume, bơta dờng mờ bơta kuơ. Ală rơnàng cau lơh ƀău dà lơgar dê geh gàr kơ̆ kơljap, bơtàu tơnguh mờ brồ guh dipal mờ jơi bơtiàn, mut gơ rờm bal pin dờn, bềng lìu bơta niam chài gơ jat bal mờ bơta bơtàu tơnguh bơh sră ƀău mờ mblàng yal jơnau dunia. Jơh ală pơgồp bơnah đơs nền mờ jờng rơ bơta kuơ, bơta pràn mờ bơngă pin dờn Việt Nam dê: “Añ jơh nùs jờng rơ mờ nting bơr gờm chờ mpồl ală cau lơh ƀău tàm gùt lơgar neh lơh ngan, pơn đơl pràn, lơh geh uă cồng nha dờng màng. Kuơmàng, añ đơs niam bơta tă pơgồp bơh ală oh mi lơh broă đơng lam, atbồ sră ƀău neh lơh gơs jak ngan kơnòl broă, lơh gơlik bơta niam nàng sră ƀău in ngai sơlơ bơtàu tơnguh, tơnguh rlau tai bơta niam sră ƀău kac màng dê, pơgồp bơnah kuơmàng tàm broă lơh tam gơl pa mờ mut gơ rờm bal dunia bơh dà lơgar he dê. Añ đơs nền bơta tă pơgồp dờng màng bơh ală kâp Mpồl cau lơh ƀău Việt Nam dê bơh dà lơgar tus kâp hơ đơm tàm sùm 73 nam do neh ngai sơlơ tơnguh broă tơrgùm, sơlơ tơrbŏ kơ̆ bơta tam klac bal mpồl cau lơh ƀău, bơto bơtê, pơlam mờ sền gàr gơnoar, bơta kuơ dipal bơh ală cau tàm mpồl dê”.

Kung di tơngkah kir sơnrai 98 nam Ngai sră ƀău kac màng Việt Nam, Kwang atbồ Ƀan Tuyên giáo dà lơgar ồng Nguyễn Trọng Nghĩa neh đơng lam dơ̆ tìp mat, lơh broă  mờ kwang đơng lam bồ ală anih lơh ƀău cíñ trị tờm ngan. Kwang atbồ Ƀan Tuyên giáo dà lơgar pà git, 12 anih lơh ƀău cíñ trị tờm ngan neh jơh nùs lam lơh broă lơh bơto bơtê, pơlam cau cih ƀău, cau cih jơnau đơs, kwang bàng, cau lơh ƀău jơh bal bè bồ tơngoh git wă tàm sră pơ àr cíñ trị mờ mờng chài lơh broă, lam lơh tam gơl sồ sră ƀău, ngan ngồn là ală anih lơh ƀău lam lài, lơh krơh lài tàm broă bơt bơtàu tiah ơm kis niam chài tàm anih lơh ƀău… Kwang atbồ Ƀan Tuyên giáo dà lơgar ồng Nguyễn Trọng Nghĩa đơs loh: “Ngai sră ƀău kac màng nam do, bol he sền wơl 2 nam mờ nggùl lơh jat Nghị quyết pơrjum dờng dơ̆ 13 bơh Đảng dê- nggùl tơngai lơh broă mờ broă wèt sền lam lơh ală broă lơh tơngkah 100 nam Ngai sră ƀău kac màng Việt Nam gơ in niam. Jat hơ̆, geh sền sơ wì dùl êt ală kơnòl broă tờm tàm 2 nam mờ nggùl, nggùl tơngai lơh broă lam lơh jat Nghị quyết Pơrjum dờng dơ̆ 13 bơh Đảng dê tàm broă lơh sră ƀău mblàng yal, tơrgùm tàm ală anih lơh ƀău tờm ngan bơh Đảng, bơh Cíñ phủ, kâp ủy gơnoar atbồ dê”.

Ngai 21/6, là ngai chờ bơh ală cau lơh ƀău kac màng gùt lơgar dê. Tàm càr lơgar Hà Nội, mang ngai 21/6, geh lơh dơ̆ jàu khà jờng sră ƀău dà lơgar dơ̆ 17 nam 2022 mờ 124 jơnau sră ƀău jak ngan rlau jơh bơh ală cau cih, cau lơh, mpồl cau cih dê geh jờng rơ. Khà jờng dơ̆ do geh rlau 1 rbô 890 jơnau sră ƀău pơyua rê pơrlòng, geh 157 jơnau sră ƀău mut tàm dar dut ndơl, Mpồl duh broă ai điểm pơrlòng sră ƀău neh rơ wah geh 124 jơnau sră ƀău jak ngan rlau jơh nàng jàu khà jờng, geh 9 khà A, 24 khà B, 46 khà C, 45 khà pơn jờng.

Jat jơnau đơs bơh Mpồl duh broă ai điểm pơrlòng sră ƀău dê, ală jơnau sră ƀău tus bal pơrlòng jat sền ală tơngume dờng bơh cíñ trị, lơh sa, niam chài, mpồl bơtiàn, sền gàr dà lơgar, sền gàr lơngăp lơngai mờ ală gah ndai bơh rài kis dà lơgar dê tàm nam 2022, yal loh làng ală broă kuơmàng dà lơgar dê. Mò Đỗ Thị Thu Hằng, Kwang atbồ Mpồl mờng chài lơh broă Mpồl cau lơh ƀău Việt Nam, Phó Củ tịc Mpồl duh broă ai điểm dar sơn rờp dơ̆ Pơrlòng sră ƀău dà lơgar dơ̆ 17 pà git: “Ală jơnau sră ƀău tus bal pơrlòng nam do niam ngan. Jơh ală jơnau sră ƀău ndrờm jat bơta geh ngan, cèng bơta broă gơlik geh pah ngai uă, lòt tus tàm ală tiah geh broă geh sền gròi uă tàm nam 2022 tàm ală gah cíñ trị, lơh sa, mpồl bơtiàn, sền gàr lơngăp lơngai, sền gàr dà lơgar, bơt bơtàu Đảng… Uă jơnau sră ƀău geh lơh nền nòn, jơh nùs ngan, tơngume cèng bơta git gŏ broă pa, cribơyai ală gùng dà, broă lơh dờng bơh Đảng, Dà lơgar dê; ai tơlik uă broă lơh bơt botàu, broă lơh niam geh bơta gơ rề, gơ rềng tàm mpồl bơtiàn. Uă jơnau sră ƀău geh bơta niam uă, geh lơh jơh nùs, nền nòn, geh rơndap tap sèng kơ̆ ngan, ai tơnggŏ bơta rềp mềr, loh làng, niam ngan, lơh gơ kờñ cau sền”.

Bơta pa bơh dơ̆ pơrlòng dơ̆ do dê là bơdìh mờ ală anih lơh ƀău dà lơgar, sră ƀău kâp hơ đơm kung neh ai tơnggŏ loh làng cồng nha lơh bal bơceh lơh, cèng bơta li la, uă bơta sră ƀău. Uă mpồl cau lơh ƀău càr neh gròi sền tàm broă lơh sac rơ wah, tơnguh bơta niam jơnau sră ƀău tus bal pơrlòng. Khà jờng sră ƀău dà lơgar dơ̆ 17 nam 2022, bơta rùp sră ƀău geh uă jơnau sră ƀău niam rlau mờ lài, kuơmàng là tàm 2, 3 mpồl, càr, ƀòn dờng neh geh bơta kơlôi rơcang niam ai jơnau sră ƀău in, pơyua jơnau sră ƀău tus bal pơrlòng uă rlau, geh ală rùp, phóng sự rùp ai tơnggŏ bơta git gŏ tơnume, broă cih jơnau sră ƀău mờng chài ngan.