Tàm sră pơyua, càr Dăk Lăk cih loh: Làng bol ală jơi bơtiàn bơh càr dê gơjrañ nùs ngan bè broă lơh lơh tìs adat boh lam bơh mpồl cau do dê. Mpồl lơh broă geh gơnoar gam sơrbac mhar jòi kŭp ală cau do mờ gam kràñ cê jơh nùs jòi kŭp ală cau gam wơl nàng lơh glài kràñ jăt jơnau cih bơh adat boh lam dê. Ală kâp ủy, gơnoar ătbồ càr neh lam lơh ală broă lơh nàng kờñ gàr kơ̆ bơta lơngăp lơngai, di tŭ lòt còp, dong kờl ală hìu bơnhă geh cau chơ̆t, gơtìp sồt să; yal, pơndờm pơnđiang làng bol bañ dơrcul nùs, ờ gŏ di rơngòt, lơh jăt jơnau bơto pơlam bơh anih lơh broă geh gơnoar dê. Tỉñ ủy, Hội đồng Ñân zân, Ủy ƀan Ñân zân, Ủy ƀan Mặt trận dà lơgar Việt Nam càr kràñ cê jơh nùs lah yă broă lơh sò tơm hìu duh broă anih lơh broă dà lơgar dê, gơsơ̆t cau, lơh tìs kơn jơ̆ ngan adat boh lam bơh mpồl cau neh lơh aniai dê; mơkung, dan tam pà bal mờ ală bơta jê sồt muăt jrùm mờ hoàc hươr roh rui dờng ngan bơh hìu bơnhă ală cau ling kwang àng, kwang bàng mờ làng bol dê. Càr Dăk Lăk hòi jà làng bol, oh mi mờ cau ling tàm càr tam klăc bal dùl nùs, pin dờn tàm gùng dà, broă lơh bơh Đảng dê, bơta lam bồ bơh kâp ủy mờ đơng lam bơh gơnoar ătbồ ală kâp dê. Tus bal jơh nùs tàm srơh “Jơh gùt làng bol sền gàr lơngăp lơngai Dà lơgar”, ngui niam bơta pràn bơh nùs nhơm rơcang lài sền gàr dà lơgar tàm jơh gùt làng bol dê gơ jăt bal mờ lơngăp lơngai làng bol kơ̆ kơl jăp; pơgồp bal, dong kờl ală mpồl lơh broă geh gơnoar lơh jăt kơnòl broă; tàm sơmbăt tê bal dong kờl, tam pà bal bơta roh rui hoàc hươr jê sồt muăt jrùm mờ ală hìu bơnhă cau ling kwang àng, kwang bàng mờ làng bol gơtìp aniai in; iang nùs lơh broă, lơh sa, pơgồp bơnah tàm bơta lơngăp lơngai mờ bơtàu tơnguh bơh càr dê. Ờ gŏ di cih pơnđàng, tàm yal tơngĭt ală jơnau yal tơngĭt jơnau geh gơrềng tàm internet mpồl bơtiàn tŭ ờ hềt geh sền swì cơng tàng nền nòn, lơh gơrềng tus ală broă lơh jăt kơnòl broă bơh ală mpồl cau lơh broă geh gơnoar dê mờ lơh gơlik nùs nhơm kơlôi rơcăng, ngòt rơngơ̆t tàm làng bol; yờ tơnguh nùs nhơm rơcăng ngăc kơrhia ngan, ngan là “bañ iăt, bañ dòn, bañ jăt” ală cau pơlơ̆ dră mờ dà lơgar, ală mpồl cau gơjrañ kwềng mờ dà lơgar sơmờm broă do nàng đơs bu ba, hoài jà tam dră wơl gơnoar ătbồ ƀòn lơgar, lơh roh lơngăp lơngai cíñ trị tàm ù tiah he dê.