Cih dờp bơta geh ngan tàm drà kă bro, tus tơngai tŭ do, phan bơna drơng broă sa tềp Dà lơgar Giáp Thìn 2024 tàm ù tiah càr Gia Lai dê li la uă ngan bè khà mờ uă ngan ală bơta, kơl dung ơn phan niam ngan nàng làng bol in rơwah blơi. Bal mờ ală drà bè ờs bơh yau dê, ală siêu thị, anih tờm kă bro dờng sùm là ală tiah gơ hòi gơ jà mpồl uă ngan cau ngui sa tài bơh gàr niam bè tiah tờm lơh gơlik. Mò Phạm Thị Diện, ơm tàm xã Cư An, thị xã An Khê, càr Gia Lai, lòt blơi phan tàm Siêu thị Co.opmart ƀòn dờng Pleiku, đơs:“Añ gŏ ală phan bơna tàm do li la uă ngan mờ niam ngan, đah tàm drà den rơngòt phan ờ ngan uă mờ kung ờ sang soh ai pràn kơl dang să jan in, phan bơna tàm do kơldung ơn phan niam mat sền ngan, ràng tơlik kung niam ngan sơl”.

Ồng Bùi Quốc Bình, Kwang atbồ Siêu thị Co.opmart ƀòn dờng Pleiku, càr Gia Lai pà gĭt, nàng lơh geh jơnau kờñ bơh drà kă bro dê, mpồl lơh broă neh blơi dùl khà phan bơna uă ngan sơl nàng ơn prap phan bơna drơng broă sa tềp in. Ồng Bùi Quốc Bình, đơs:“Bơta blơi phan bơh làng bol dê tàm tơngai sa tềp Giáp Thìn nam 2024 gơguh pơgap 3 dơ̆ pơndrờm mờ ală ngai bè ờs, ờ lời bơta ờ geh phan bơna gơguh giă gơlik geh, tus bal lơh niam giă drà kă bro den siêu thị rcang lài pơgap 110 tơmàn đong nàng drơng broă ai làng bol in tàm tơngai sa tềp do. Tŭ do phan bơna do bol añ kung neh rcang geh lài mờ tơngai sa tềp pơgap 2 nhai mờ tŭ do den gơ lơh  bè là pơgap bơh 60 tus 70% khà phan bơna sa tềp neh tơrgùm tàm siêu thị. Phan bơna pal geh tiah tờm lơh gơlik loh làng, pal sàng goh phan ngui sa”.

Jat jơnau kờp dŭ lài bơh Sở Kông thương càr Gia Lai dê, kờp jơh khà jun pơndiang phan bơna mờ priă lơh geh bơh drơng broă sa tềp Dà lơgar kờp dŭ lơh geh 17 rơbô 500 tơmàn đong. Nàng gàr tơl phan bơna kwơ màng tàm tơngai sa tềp, Sở Kông thương sồr ală mpồl lơh broă, mpồl lơh sa kă bro lam lơh broă rơndăp lơh ơn prap phan bơna kwơ màng gàr niam bơta lơh niam giă drà kă bro dê, lơh jat geh cồng nha broă lơh lơh niam giă, lơh jat tăc phan di mờ giă neh lĭp, ờ gŏ di lời gơlik geh bơta ờ tơl phan bơna, gơguh giă uă. Mơkung hơ pơrgon phan bơna kwơ màng pal gàr tơl bơta niam, geh sră blơi phan tơl làm, geh tiah tờm lơh gơlik phan loh làng.

Ồng Rcom Jen, Phó Kwang atbồ Sở Kông Thương càr Gia Lai, đơs:“Sở Kông thương neh ai lơh jat broă rơndăp lơh ơn prap phan bơna nam 2024, lòt sền sền gròi phan bơna, ală jơnau sồr bè sàng goh phan ngui sa, kă bro điện tử. Bơh broă sền gĭt ală bơta, sền bal broă lơh kă bro niam ngan. Lơh jat ală broă lơh gơ hòi gơ jà phan bơna, lơh uă broă lơh ai phan bơna rê tàm ƀòn lơgar, pơgồp bal mờ atbồ drà kă bro nàng sền gròi phan bơna, dilah sền gŏ phan ờ ngan, ờ gĭt loh tiah tờm lơh gơlik den rơ̆p pơgồp bal mờ mpồl atbồ drà kă bro lơh glài kràñ jat adat boh lam gam ngui tŭ do”.

Nàng kờñ gàr niam bơta tàm pơnring jơnau kờñ blơi phan, mờ jơnau kờñ tăc phan, drơng broă làng bol in blơi phan, Ủy ƀan Ñân zân càr Dăk Lăk lam lơh uă broă lơh lơh niam giă drà kă bro ală bơta phan kwơ màng tàm tơngai lồi nam 2023 mờ Sa tềp Giáp Thìn 2024. Tơngai lơh niam giă bơh bồ nhai 12 nam 2023 tus jơh nhai 02 nam 2024. Mpồl bơta phan lơh niam giă, geh: kòi phe, phan ngui sa (poăc sur, poăc iar ada, tăp iar ada, dơngi, sơdàng, ƀòk ngòk mờ ală bơta phan bơna lơh gơlik, biăp, bùm kơnuh plai chi), ñiên liệu. Do là ală mpồl, bơta phan kwơ màng, jơnau kờñ ngui uă; ƀuơn aniai bè jơnau kờñ blơi mờ jơnau kờñ tăc phan, giă phan bơna dê.

Càr Dăk Lăk neh hòi jà geh 11 mpồl lơh sa kă bro, siêu thị, ală anih ràng tăc phan tus bal broă lơh lơh niam giă drà kă bro tàm tơngai lồi nam 2023 mờ sa tềp Giáp Thìn 2024. Kờp dŭ khà priă ngui nàng ơn prap phan bơna drơng broă sa tềp là rlau 473 tơmàn đong, lơh geh jơnau kờñ mờr 27% jơnau kờñ ngui sa bơh làng bol dê tàm bơta digơlan ờ hoan geh phan bơna. Bơdìh hơ̆, khà phan bơna tàm ală drà, anih ràng tăc phan kung là dùl gah dờng lơh geh jơnau kờñ blơi phan bơna bơh làng bol dê tàm tơngai sa tềp. Ồng Lưu Văn Khôi, kwang atbồ Sở Kông thương càr Dăk Lăk, pà gĭt: bal mờ lơh niam giă phan bơna drơng broă sa tềp, càr kung lơh pràn ală broă lơh kơryan phan bơna ờ hoan niam mờ blăc pơrlồm kă bro:“Gah Kông thương bal mờ Ủy ƀan Ñân zân ală kơnhoàl, thị xã, ƀòn dờng rơ̆p geh ală broă lơh geh ngan nàng lơh geh tơl ală phan bơna kung bè gàr niam giă phan bơna kơ̆ kơl jăp. Bơdìh hơ̆ là sơlơ tơnguh ală broă lơh lòt sền, gròi sền nàng dră wơl mờ phan ờ ngan, phan ờ niam den dră wơl mờ blăc pơrlồm kă bro”.

 Nàng kờñ kơryan bơta ơn prap phan, tơnguh giă ờ di pal; gàr niam bơta bè ờs drà kă bro dê, Kụk atbồ drà kă bro càr Dăk Lăk pa lam lơh broă rơndăp lơh lam lơh uă broă dră wơl mờ kă bro tìs mờ adat boh lam, blăc pơrlồm kă bro mờ phan ờ ngan tàm tơngai lài, tàm tŭ mờ tơnơ̆ tơngai sa tềp Giáp Thìn nam 2024. Bal mờ hơ̆ ală Mpồl kung rơ̆p bơyai lơh jat sền kràñ broă kă bro xăng zờu, nhơm zờu lơh gơlik dà, ờ gŏ lời gơlik geh bơta ơn prap phan, tơnguh giă ờ di pal nàng kờñ pơgồp bơnah gàr niam bơta bè ờs drà kă bro dê nàng drơng broă sa tềp ai làng bol in.