Dơ̆ pơrlòng jơh bơsram kấp pe nam do càr Kon Tum geh rơlao 5 rơbô nă cau pơrlòng, gơguh 273 nă cau pơn drờm mờ nam lài. Tàm hơ̆, rơlao 4 rơbô 800 nă cau pơrlòng jăt broă bơsram kấp pe mờ rơlao 160 nă cau pơrlòng tus pơrlòng broă bơto jơh bơsram giáo zụk thường xuyên. Khà cau pơrlòng kòn cau tus pơrlòng geh rơlao 1 rơbô 700 nă, cau pơrlòng khăt gơboh mờr 220 nă. Càr Kon Tum neh lơh geh 12 anih pơrlòng, tàm hơ̆ geh 5 anih pơrlòng tàm ƀòn dờng Kon Tum, 7 anih pơrlòng tàm ală kơnhoàl mờ cau geh ai tus sền pơrlòng tàm ală anih pơrlòng là rơlao 900 nă. Pơgru Bùi Văn Quốc, Phó Kwang atbồ Hìu bơsram zân tộk nội trú – Hìu bơsram kấp bàr kơnhoàl Kon Plông pà git, nam do, hìu bơsram geh 82 nă kơnòm bơsram tus pơrlòng jơh bơsram kấp pe mờ ndrờm là oh kòn kòn cau Sơdàng dê lơm. “Tus tŭ do hìu bơsram neh lơh gơs broă bơsram wơl tơngai sơnrờp, hìu bơsram kung neh bơyai lơh pơrlòng tơrlòng ai kơnòm bơsram in. Tàm tơngai tus, hìu bơsram pơn jăt tai tam cah ală kơnòm bơsram bơsram ờ jăk nàng dong kờl bơto tai nàng lơh ngan geh 100% kơnòm bơsram geh tơl khà jơh bơsram. Bè broă ròng siam kơnòm bơsram, hìu bơsram đơng lam bơnah lơh sră nggal hìu bơsram tơnguh phan sa ai ală kơnòm bơsram in tàm nhai 6 nàng geh tơl bơta pràn kơl dang să jan ai ală kơnòm in tus pơrlòng”.

Dơ̆ pơrlòng jơh bơsram kấp pe nam 2023, càr Gia Lai geh rơlao 14 rơbô 800 nă cau pơrlòng geh cih măt dan tus pơrlòng, tàm hơ̆ geh rơlao 3 rơbô 100 nă là oh kòn, kòn cau. Càr hòi jà geh di pơgăp 2 rơbô 300 nă kwang bàng lơh jăt broă sền pơrlòng tàm 41 anih pơrlòng tàm 17 kơnhoàl, thị xã, ƀòn dờng. Mpồl đơng lam kấp càr neh hòi jà jơh UɃÑZ ală kơnhoàl, thị xã, ƀòn dờng mờ ală gah lơh broă gơrềng bal dong kờl cau tus pơrlòng bè rơndeh lòt rê, ai anih sào sa, hìu ơm ală cau pơrlòng in. Bơdìh hơ̆ tai, sền wơl, dong kờl priă ai ală kơnòm bơsram là kòn cau, hìu nhă geh sră dong kờl bơh dà lơgar, hìu rơƀah, kơnòm bơsram tàm tiah ngài. Tàm hơ̆ uă ngan là ờ lời kơnòm bơsram lơi pal sơbì pơrlòng tài gơtìp kal ke bè priă jền ha là phan lòt rê.

Đơs tàm dơ̆ lơh broă mờ Mpồl đơng lam Dơ̆ pơrlòng jơh bơsram kấp pe càr Kon Tum mờ Gia Lai, Thứ trưởng Ƀộ Giáo zụk mờ Đào tạo mò Ngô Thị Minh neh dờp, đơs niam broă rơcang bơyai lơh dơ̆ pơrlòng geh rơcang lài bơh ală tiah dê. Mờ sồr ală mpồl lơh broă gơrềng bal pal pơn jăt tai lơh jăt nền nòn ală kơrnoăt bơh Ƀộ Giáo zụk mờ Đào tạo dê bè broă pơrlòng; sền wơl ală broă rơcang lài nàng gŏ gờñ mờ bơsong di tŭ di lah gơtìp. Tơnguh broă yal mblàng, bơto sồr cau pơrlòng mờ cau mè bèp bè kơrnoăt, bơto sồr pơrlòng; pơgồp bal nền nòn mờ ală anih lơh broă geh gơnoar nàng gàr niam bơta lơngăp lơngai, ndrờm bal ai dơ̆ pơrlòng in. Thứ trưởng Ƀộ Giáo zụk mờ Đào tạo mò Ngô Thị Minh đơs: “Mpồl đơng lam càr bè dơ̆ pơrlòng jơh bơsram kấp pe nam 2023 neh lơh jăt kơrnoăt mờ neh rơcang lài tàm broă lơh bơh să tờm dê. Broă bơsram tàp ai ală cau lơh broă sền pơrlòng là broă pal geh lơh, geh gŏ ală bơta lơi gơwèt bè sră nggal gam ờ hềt di pal den càr geh dan, cri bơyai nàng tơnơ̆ mờ ală dơ̆ pơrlòng, dơ̆ pơrlòng nam tơnơ̆ lơh geh cồng nha mờ niam rơlao dơ̆ pơrlòng nam lài. Kơrnoăt pơrlòng gơwèt mờ ală kơnòm bơsram geh tus tơn tus bal dơ̆ pơrlòng, den he kung pal bañ sền ờ sơ̆p, broă yal kơrnoăt pơrlòng ai ală kơnòm bơsram in pal tam gơl broă yal kơrnoăt pơrlòng nàng ală kơnòm bơsram kung mùl màl là cau tus bal sơl tàm bơta do sơl. Broă ală kơnòm bơsram tus bal pơrlòng mờ kơnòl bè jơ, kơrnoăt bè kung pal lơh ngan yal mblàng tus mờ ală kơnòm in”.

Thứ trưởng Ƀộ Giáo zụk mờ Đào tạo mò Ngô Thị Minh kung sồr ală càr pal pleh mờ nùs nhơm sền ờ sơ̆p; tàm broă bơsram tàp Kơrnoăt pơrlòng pal tam gơl broă lơh nàng cau geh bơsram tàp in git tơl kơrnoăt di mờ gơnoar, kơnòl bơh să tờm dê; ai geh jơnau git wă, jơnau jăk chài nàng cau lơh kơnòl tàm dơ̆ pơrlòng geh rơcang sơndră lài mờ ală bơta di gơlan gơlik geh; broă rơndăp lơh sền wơl bơh Mpồl đơng lam dơ̆ pơrlòng pal geh lơh nền nòn, mùl màl. Thứ trưởng Ƀộ Giáo zụk mờ Đào tạo mò Ngô Thị Minh đơs tờm tai: “Dơ̆ pơrlòng pal geh gàr niam ală jơnau kờñ geh ai bè bơta lơngăp lơngai. Bè bơta pràn kơl dang să jan, màng kis ai ală kơnòm in. He lơh ngan nàng ală kơnòm bơsram mŭt tàm anih pơrlòng tàm nùs nhơm mùl màl niam, ngăc ngar. Lơngăp lơngai tàm phan sa. Lơngăp lơngai tàm trồ tiah di lah trồ tiah mìu, gùng ntiar, broă lòt rê bơh ală kơnòm bơsram gơtìp kal ke. Lơngăp lơngai tàm broă rơcang sơndră mờ ồs sa bơrtoh, geh uă tŭ trồ mìu càl pồt pràn lơh che đèng gơtìp tamtŭp bal. Lơngăp lơngai tà broă prăp gàr tơngu me jơnau pơrlòng, jơnau pơrlòng. Lơngăp lơngai tàm broă rơcang sơndră mờ kòp gơtờp nàng dơ̆ pơrlòng geh lơh niam”.

Dơ̆ pơrlòng jơh bơsram kấp pe nam 2023 geh bơyai lơh tàm lồi nhai 6. Tàm hơ̆, ngai 27 nhai 06 là ngai lơh sră nggal tus pơrlòng. Bơyai lơh sền pơrlòng jơh bơsram kấp pe tàm 2 ngai bơh ngai 28 tus ngai 29 nhai 06. Ală càr pal sền gròi tus mờ broă yal tơngit nàng kơnòm bơsram, cau mè bèp kơnòm bơsram bal mờ mpồl bơtiàn in wă bè bơta kwơ màng bơh dơ̆ pơrlòng jơh bơsram kấp pe; Di tŭ pơn jờng gơwèt mờ ală mpồl lơh broă, cau dùl nă să geh cồng nha tàm broă bơyai lơh pơrlòng kung bè lơh glài nền nòn ală cau lơi tìs lơh ờ niam tus mờ dơ̆ pơrlòng.