Ờ mìng tàm ơdŭ bơsram, tàm ală cơldŭ ơm bơh ală kơnòm bơsram dê tàm hìu ơm bal bơh hìu bơsram kâp 3 kòn cau ơm wơl mờ kâp 2 kơnhoàl Kon Plông, nùs nhơm bơsram wơl jơnau git wă rơcang tus pơrlòng kung geh lơh nền nòn mờ jal mhar. Bơdìh mờ tŭ jơ geh ală pơgru pơlam jơnau git wă tàm ơdŭ, 82 nă kơnòm bơsram bơh hìu bơsram dê tus bal dơ̆ pơrlòng jơh bơsram kâp 3 nam do kung git kơlôi is tàm broă bơsram wơl is jơnau git wă. Oh Trần Trung Thành, kơnòm bơsram ơdŭ 12B pà git: “Bol oh tam pà tŭ jơ ƀùi drim bơsram wơl jơnau git wă mờ bơsram tàm ơdŭ. Ƀùi mho den bơsram wơl jơnau git wă ndang, nhơl ñŏ lơh prài bồ tơngoh dùl êt nàng he in ờ huan gơ lơh kơn jơ̆ nùs tồr. Bol oh lơh ngan mờ pơn đơl jơh pràn nàng bơsram jơh ală jơnau git wă mờ pơgru neh bơto wơl kung bè bol oh pơn đơl lơh tai uă jơnau lùp pơrlòng ai lơh tơrlòng lài, sền git jơnau lùp pơrlòng ală nam lài dê nàng gơtùi geh jơnau git wă kơ̆ kơljap ai dơ̆ pơrlòng jơh bơsram kâp 3 mờr tus in”.

Gơ wèt mờ 69 nă kơnòm bơsram là oh kòn jơi bơtiàn dùl êt nă cau tus bal pơrlòng jơh bơsram kâp 3 nam do, pơgru Bùi Văn Quế, Phó Kwang atbồ Hìu bơsram kâp 3 kòn cau ơm wơl mờ kâp 2 kơnhoàl Kon Plông pà git, Mpồl đơng lam hìu bơsram mờ ală pơgru lời ai ală oh in bơta gròi sền uă ngan bè: sồr cau pơgru gròi sền broă bơsram wơl jơnau git wă bơh kơnòm bơsram dê tàm trồ mang; gơ wèt mờ ală oh bơsram ờ huan jak den sồr cau pơgru pơlam is nàng dong ală oh geh tai bơta pin dờn nàng mut tàm dơ̆ pơrlòng: “Mpồl đơng lam hìu bơsram sùm đềt mềr, gròi sền, pơn jờng ală oh tàm broă bơsram sră tàm ơdŭ. Bơdìh hơ̆ tai tàm ală dơ̆ sàu sa pah ngai bol hi mù tàm hìu ƀềp lùp còp ală oh bè broă sàu sa. Mpồl đơng lam hìu bơsram lơh sră dan Ủy ƀan Ñân zân kơnhoàl Kon Plông dong kờl priă jền ai 69 nă kơnòm bơsram jơi bơtiàn dùl êt nă cau in bè priă sa tàm 4 ngai ală oh pơrlòng nàng tơnguh tai phan sa ală oh in nàng kờñ pơn jờng nùs nhơm ală oh dê”.

Dơ̆ pơrlòng jơh bơsram kâp 3 nam do, càr Kon Tum geh 5 rbô 28 nă cau pơrlòng, tàm hơ̆ geh 1 rbô 722 nă cau pơrlòng là cau jơi bơtiàn dùl êt nă cau. Mò Phạm Thị Trung, Kwang atbồ Sở Giáo zụk mờ Đào tạo càr Kon Tum pà git, kòp Kovid-19 jŏ jòng uă nam neh lơh gơ rềng uă ngan tus broă bơsram bơh ală kơnòm bơsram dê đơs bal mờ oh kòn jơi bơtiàn dùl êt nă cau đơs is. Nàng dong tơl nă oh git kơ̆ jơnau git wă, git kơ̆ bơta chài lơh jơnau pơrlòng, Sở Giáo zụk mờ Đào tạo càr Kon Tum lam lơh broă lơh lơh gơs bơta krơi is tàm bơsram wơl jơnau git wă: ‘Tus tơngai dut ndơl, Sở kung neh lơh Mpồl broă lơh làm bă tiah tus tơl hìu bơsram jàu khà broă rơndap lơh mờ tus bal ală tŭ jơ bơto wơl jơnau git wă jat broă lơh lơh gơs bơta krơi is tàm bơsram wơl jơnau git wă. Tơl nă oh là dùl broă rơndap lơh, jơnau kờñ is. Bơsram wơl jơnau git wă jat nùs nhơm hơ̆ nàng ală oh in git bơta ờ pràn mờ bơta pràn he dê. Tơnơ̆ tŭ pơrlòng lài pa do den bol hi sac rơ wah tai dùl dơ̆. Ală kơnòm bơsram kờñ geh dong kờl krơi is den ală hìu bơsram rơcang ală tơngume, mpồl broă lơh dong kơnòm bơsram in geh tơl bơta pin dờn bè jơnau git wă kung bè bơta chài lơh jơnau pơrlòng tàm dơ̆ pơrlòng do”.

Dơ̆ pơrlòng nam do, gùt càr Dăk Lăk geh rlau 21 rbô nă cau cih mat tus bal pơrlòng, tàm hơ̆ cau pơrlòng là cau jơi bơtiàn dùl êt nă cau geh 28%. Bè khà anih pơrlòng, geh 33 anih pơrlòng ngan ngồn mờ kờp jơh 900 cơldŭ pơrlòng. Tus tŭ do, ală hìu bơsram neh gàr niam tơl bơta bè phan bơna, măi mok tàm ală anih pơrlòng, anih photo jơnau lùp pơrlòng mờ anih ai điểm pơrlòng jat jơnau sồr.

Sở kung ai mờr 3 rbô nă kwang bàng sền pơrlòng, jat sền, drơng broă dơ̆ pơrlòng in, ờ hềt kờp mpồl lùp sền. Broă bơto pơlam kwang bàng sền pơrlòng, rơcang lài phan bơna, rơcang sơndră kòp jê ai cau pơrlòng in neh geh gàr niam. Mpồl đơng lam dơ̆ pơrlòng pà git, gam lơh niam broă lơh mblàng yal, pơn jờng nùs nhơm nàng kơnòm bơsram iang nùs tus bal pơrlòng. Mờ kung đơs nền neh rơcang nền nòn, wil tơl, gàr lơngăp lơngai niam ngan rlau jơh tàm ală ngai bơyai lơh pơrlòng. Đại tá Nguyễn Hữu Lương, Kwang atbồ Cơldŭ lơngăp lơngai cíñ trị tàm dơlam is, Kwang àng càr Dăk Lăk pà git: “Jơh ală broă lơh gơ rềng tus ală mpồl cau lơh gơbàn broă roh bơta lơngăp lơngau tàm Cư Kuiñ bulah geh gơ rềng tus bơta gàr lơngăp lơngai mơya bol hi gŏ là, ờ geh bơta lơi pal kơlôi rơcang nàng bơyai lơh pơrlòng ai ală oh tàm càr Dăk Lăk dê in tŭ do. Ală mpồl kwang bàng càr Dăk Lăk pơgồp nền nòn mờ Sở giáo zụk ring bal tàm ală broă lơh bơh kâp càr tus kâp kơnhoàl rơp gàr lơngăp lơngai ai dơ̆ pơrlòng do in”.