Mờ tơngume “Buôn Ma Thuột- Anih tus bơh kơphê dunia dê”, dơ̆ lơh chờ neh lơh geh cồng nha bal mờ uă jơnau kah wơl niam ngan, kah kir tàm nùs nhơm làng bol mờ năc lòt nhơl. Dơ̆ lơh chờ neh yal tơngĭt geh 5 jơnau yal: tàm pơdờn; anih tus; mŭt gơrờm bal mờ dunia; bơta lơh gơrề uă mờ bơta dunia bal mờ bơta kơ̆p kờñ ngan tơnguh bơngă bơh Kơphê Buôn Ma Thuột dê; yal tơngĭt niam chài Kơphê Buôn Ma Thuột tus mờ gơ̆p bơyô dunia.

Tàm dơ̆ lơh chờ geh Pơrjum tàm tơrbŏ bal lòt rê rề ơnàng kă bro phan bơna dunia nam 2023 geh bơta tus bal bơh rlau 464 nă cau ala măt dê, tàm hơ̆ geh 86 nă cau ala măt bơh ală mpồl dunia dê là đại sứ quán, lãñ sự quán ală lơgar tàm Việt Nam. Tơn jơh pơrjum neh geh 10 yô sră nggal, cih kah lơh broă bal neh geh kĭ hơ ală mpồl lơh sa kă bro tăc phan mờ lơgar ndai mờ ală cau blơi phan tus bơh ală lơgar: Lo, Hàn Quốc mờ mpồl lơh sa kă bro lơgar Việt Nam dê. 

Gơrềng tus mờ broă tơrbŏ bal gùng kă bro, tàm nam 2023, ală càr tàm Tây Nguyên neh geh uă broă lơh ngan mờ cèng geh cồng nha niam bơnĕ ngan. Kwang đơng lam càr Lâm Đồng neh tus bal, bơyai lơh broă tơrbŏ bal gùng kă bro mờ uă càr, ƀòn dờng tàm gùt lơgar; hòi jà lơh broă bal ờ uă gah broă mờ lơgar Nhờk, Hàn Quốk, Ấn Độ.

Cồng nha mùl màl, lồi nam 2023, dơ̆ par bơh gah rơndeh par JeJu Air bơh ƀlàng rơndeh par Incheon, càr lơgar Seoul, lơgar Hàn Quốk neh par tus tơn ƀlàng rơndeh par Liang Khàng, càr Lâm Đồng, ai tơngŏ broă sơn đờm niam bơnĕ ngan, tơnguh rơlao tai broă pơgồp bal nền nòn đah gơnoar atbồ càr Lâm Đồng mờ càr lơgar Seoul đơs is mờ ală càr, ƀòn dờng lơgar Hàn Quốk đơs bal, tơmù bơta ngài đah bàr tiah, ai tơl bơta ƀuơn nàng làng bol mờ cau năc lòt nhơl tus nhơl sền, bơsram sră mờ càr Lâm Đồng kung kơ̆p kờñ ai geh bơta pràn pa tàm jơnau hòi jà bơcri priă, bơtàu tơnguh lơh sa mpồl bơtiàn.