Tàm Hà Nội, Thủ tướng Cíñ phủ ồng Phạm Minh Chính đơng lam dơ̆ lơh broă đah Duh broă sùm Cíñ phủ mờ Mpồl đơng lam Ală mpồl lơh sa kă bro di mơ mờ dềt hòi lơyah là SME bè broă lơh broă bơh ală mpồl dê, ală mpồl lơh sa kă bro SME mờ ală broă lơh tă bơsong kal ke ai mpồl lơh sa kă bro in.

Tơnơ̆ tŭ iăt jơnau đơs tă pơgồp bơh Ală mpồl SME dê, ală mpồl lơh sa kă bro mờ bơnah mblàng hơ, dan broă bơsong bơh ală ƀộ, gah lơh broă mờ kwang đơng lam bồ ală ngân hàng dê, pơndŭt dơ̆ lơh broă, Thủ tướng Cíñ phủ ồng Phạm Minh Chính đơs nền Cíñ phủ sùm iăt kơno, tam pà bal, lơh ngan nàng geh ală broă lơh tă bơsong kal ke ai mpồl lơh sa kă bro in, bè lơh ală broă lơh tơn jŏ tơngai tơm priă dia, priă apah ù, ờ tă halà tơrmù dia, priă tă, priă pal tă; tơrgùm tă bơsong kal ke; dong kờl ală drà kă bro trái phiếu mpồl lơh sa kă bro, ù tiah hìu đam; lơh pràn lơh tam gơl pa sră pơ àr, lơh tam gơl niam tiah bơcri priă lơh sa kă bro; dong kờl mpồl lơh sa kă bro bơtàu tơnguh wơl mhar mờ bơtàu tơnguh kơ̆ kơl jăp jŏ jòng.