Dơ̆ lòt còp lơgar Singapore bơh Thủ tướng ồng Phạm Minh Chính dê geh lơh tàm tŭ bơta gĭt gơ̆p Tam klăc lơh broă bal jŏ jòng đah Việt Nam mờ Singapore bơtàu tơnguh duh hồl mờ pràn kơldang tàm ală gah broă. Nam 2023 do, bàr lơgar tơngkah kir sơnrai 50 nam ngai lơh bơta gĭt gơ̆p cribơyai broă mờ lơgar ndai mờ 10 nam lơh bơta gĭt gơ̆p Tam klăc lơh broă bal jŏ jòng. Singapore gàr anih lam lài tàm Asean mờ ơm dơ̆ 2 tàm 141 dà lơgar mờ kơnhoàl ù tiah bơcri priă tàm lơgar Việt Nam bal mờ rlau 3 rbô rơndăp broă lơh gam geh lơh mờ kờp jơh priă bơcri lơh geh cih tàm sră pơ àr là 70 tơmàn dolar Mỹ. Dơ̆ lòt còp bơh Thủ tướng ồng Phạm Minh Chính dê nàng kờñ đơs nền ai lơh broă bal tàm tơrbŏ lơh sa đah Việt Nam mờ Singapore gơguh tus bơta bơtàu tơnguh pa tàm tŭ dùl ròt ală Hiệp địñ kă bro khăt gơboh (FTA) rài pa geh bơta tus bal bơh lơgar Việt Nam mờ Singapore dê geh ai ngui mờ ai lam lơh jăt, tàm hơ̆ geh Hiệp địñ tam klăc lơh broă bal tơl ală bơta mờ gơguh jak gan gùt Thái Bình Dương (CPTPP), Hiệp địñ Tam klăc lơh broă bal Lơh sa tơl làm kơnhoàl ù tiah do (RCEP).