VOV4.K’ho- Drim ngai 5/07, Thủ tướng Cíñ phủ ồng Phạm Minh Chính đơng lam pơrjum dơ̆ 15 bơh Mpồl đơng lam dà lơgar rcang sơndră kòp Kovid-19. Đơs tàm dơ̆ pơrjum, Thủ tướng Cíñ phủ ồng Phạm Minh Chính sồr ală kwang bàng tơrgùm cribơyai, sền sơwì bè bơta kòp tàm dunia, tàm tiah do mờ tàm lơgar, ală bơta gơlik geh pa, krơi, ală bơta kal ke, ală cồng nha neh lơh geh, ală gah ờ hềt lơh niam, mblàng ală jơnau gơbàn, ai tơlik jơnau kờñ, nùs nhơm, bồ tơngoh đơng lam, gùng dà broă lơh nàng pơn jat tai dơ̆ sơndră kòp Kovid-19 tàm tơngai tus.

Tŭ do, tàm lơgar, kung gam geh tiah, geh tŭ sền ờ sơ̆p mờ ờ rcang sền ngăc, ờ rcang ngăc tơnơ̆ tŭ bơta kòp sền bal neh geh gròi sền, ngan là tŭ tơngai cĭt vaccine gam lơyài, ờ hềt lơh geh jơnau kờñ geh ai, tàm hơ̆ geh broă cĭt vaccine ai kơnòm dềt bơh 5 tus 11 sơnam in mờ cĭt ding dơ̆ 3 ai cau bơh 12 tus 17 sơnam in, bulah Cíñ phủ, Thủ tướng Cíñ phủ neh đơng lam sùm. Thủ tướng ồng Phạm Minh Chính đơs sùm, bañ sền ờ sơ̆p mờ ờ rcang sền ngăc, roh bơta rcang ngăc; pal geh broă lơh rcang lài, lơh niam ngan. Tàm hơ̆, bơta geh ngan pà gŏ vaccine kung gam là bơta tờm lơh nền. Broă cĭt vaccine là gơnoar kwơ, là kơnòl mờ là kơnòl broă bơh tơl nă cau dê nàng sền gàr să tờm he dê, hìu bơnhă mờ mpồl bơtiàn.

Cau mblàng K’Hạnh