VOV4.K’ho- Drim ngai 04/07, bơh bơta đơng lam bơh Thủ tướng Cíñ phủ ồng Phạm Minh Chính dê, neh sơnđờm mut pơrjum pờ tơlik tơn tàm internet Cíñ phủ mờ ală tiah mờ dơ̆ pơrjum Cíñ phủ ờs mờng nhai 6 nam 2022 bè bơta lơh sa - mpồl bơtiàn nhai 6 mờ 6 nhai nam 2022.

Anih bơyai lơh pơrjum

Đơs tàm dơ̆ pơrjum, Thủ tướng Cíñ phủ ồng Phạm Minh Chính pà gĭt, lơh sa- mpồl bơtiàn nhai 6 mờ 6 nhai nam 2022 bơtàu tơnguh tàm jơh ală gah, geh bơta bơtàu tơnguh uă, lơh geh tềl lời wơl niam ngan. Lơh sa dờng kơ̆ kơljap, bơta roh bơngă khà priă geh gròi sền bulah uă bơta kal ke, ngan là giă xăng zờu gơguh uă, ală broă lơh ring bal dờng geh gàr niam ai, tă priă kes priă, tăc mờ blơi phan hờ lơgar ndai, jơnau kờñ ngui cau lơh broă mờ jơnau kờñ geh broă lơh, năng lượng mờ phan ngui sa kờñ pal geh. Thủ tướng đơs sùm, ală cồng nha lơh geh là bơh bơta đơng lam jak ngan bơh Ƀan Cấp hàñ Đảng dà lơgar, Ƀộ Cíñ trị, Ƀan Ƀí thư dê, lam bồ là Tổng Ƀí thư ồng Nguyễn Phú Trọng, bal mờ ală gùng dà broă lơh dờng màng bơh Dà lơgar, tàm hơ̆ geh ală Nghị quyết bơh Quốk hội; bơta đơng lam kràñ cê jơh nùs, pràn kơl dang, geh bơta tờm bơh Cíñ phủ, Thủ tướng Cíñ phủ dê, bơta lơh ngan bơh jơh bal ală anih lơh broă cíñ trị bal mờ mpồl bơtiàn, mpồl lơh sa kă bro, bơta dùl nùs bal, tă pơgồp bal bơh làng bol gùt lơgar dê bal mờ bơta dong kờl bơh gơ̆p bơyô dunia.

Cau mblàng K’Hạnh