Tàm dơ̆ tìp Thủ tướng lơgar Campuchia, bàr gah ring bal geh lơh jăt geh cồng nha ală jơnau ring bal neh geh kĭ đah bàr lơgar dê; lơh pràn broă lơh broă bal, tơrbŏ bal bàr gah lơh sa, pơgồp bal tàm broă dong kờl bal bơ̆t bơtàu gah lơh sa krơi is, lơh tờm pơgồp bal mờ broă tơrgùm mờ dunia jrô ơnàng, mùl màl mờ geh cồng nha.

Tàm dơ̆ tìp mờ Kwang atbồ lơgar Philippines, bàr Kwang đơng lam đơs nền broă kờñ tơnguh lơh broă bal đah lơgar Việt Nam mờ lơgar Philippines nàng di tŭ sơndră tềng đăp mờ bơta kal ke bơh bơta tàm dunia mờ tàm tiah do tàm tơngai do. Tàm dơ̆ tìp mờ Thủ tướng lơgar Singapore ồng Lý Hiển Long, bàr kwang đơng lam kung neh đơs nền tus mờ broă tơnguh broă tìp bal nàng sền wơl mờ cri bơyai gùng dà broă lơh nàng bơsong ală bơta kal ke, gơkòl mờ ai geh bơta ƀuơn ai broă lơh broă bal tàm ală gah broă. Bàr Thủ tướng neh cri bơyai bè gùng dà broă lơh nàng wèt tus broă tơnguh bơta git gơ̆p đah bàr lơgar tus tàm bơta Tam klăc bal jŏ jòng tơl ală bơta tàm tơngai di pal. Bàr kwang đơng lam neh cri bơyai bè ală broă lơh geh ai lài, broă lơh tờm tàm broă bơtàu tơnguh lơh broă lơh sa bal đah lơgar Việt Nam mờ lơgar Singapore dê.