Đơs tàm do, Thủ tướng Cíñ phủ ồng Phạm Minh Chính đơs nền tàm cồng nha bal bơh Dà lơgar dê geh bơta tă pơgồp kwơ màng bơh ală cau kơđơng Yàng Phờk đơs bal, gah Nam Tông Khmer đơs is. Thủ tướng đơs nền, Đảng, Dà lơgar sùm pơnđơl pràn lơh ngan tài bơta hờm ram, chờ hờp bơh làng bol dê đơs bal, sền gàr gơnoar kòn bơnus, khat gơboh pin dờn jăt Yàng, gah jat Yàng bơh làng bol dê; tàm hơ̆, sền gròi, dong kờl ală cau jat Yàng bơh gah Nam Tông Khmer dê đơs is.

Ala mat Kwang đơng lam bồ Đảng, Dà lơgar, Thủ tướng gờm chờ ală cau kơđơng Yàng Phờk, cau jat Yàng Phờk, làng bol kòn cau Khmer di dơ̆ Lơh chờ Sen Dolta nam 2023 mờ kơ̆p kờñ làng bol kòn cau Khmer lơh broă sa bơtàu tơnguh, lơngai lơngò, rài kis ngai sơlơ hờm ram, chờ hờp; Thủ tướng sồr Đảng ƀộ, gơnoar atbồ, Mặt trận Dà lơgar càr Trà Vinh sền gròi dong kờl niam ngan rlau jơh rài kis phan bơna mờ nùs nhơm ai làng bol in.