Tơngai do, Đảng, Dà lơgar, Cíñ phủ neh ai uă ngan priă nàng tơnguh bơtàu broă lơh gùng lòt, tam pà priă bơcri geh tơrgùm bal tàm ală tiah, ală càr, ƀòn dờng. Đơs tàm dơ̆ pơrjum, Thủ tướng Cíñ phủ ồng Phạm Minh Chính đơs loh, Rơndăp broă lơh gùng rơndeh lòt mhar Tuyên Quang – Hà Giang jòng 105 kơi sồ, kờp jơh khà priă bơcri 10 rơbô tơmàn đong geh Cíñ phủ tam pà ai bàr càr Tuyên Quang mờ Hà Giang in lơh anih tờm bơcri priă, lơh jăt broă bơcri priă dà lơgar tàm broă brồ guh wơl mờ tơnguh bơtàu lơh sa mpồl bơtiàn.

Do kung là tơngu me lơh mùl màl jơh Nghị quyết bơh Ƀộ Cíñ trị dê bè gùng dà tơnguh bơtàu lơh sa mpồl bơtiàn, sền gàr dà lơgar, bơta lơngăp lơngai Tiah tàm gùl mờ tiah kơh bơnơm hờ đah Tô dà lơgar tus nam 2030, swèt tus nam 2045. Thủ tướng sồr, tơnơ̆ mờ pơrjum sơn đờm mŭt lơh, sồr ală anih lơh broă, mpồl lơh broă tơrgùm jơh bơta pràn, pơrlòng lơh ngan lơh gơs ală kơnòl neh geh ai.