Tàm nùs nhơm gĭt gơ̆p, pin dờn mờ sơr mah sơr mài, Thủ tướng Cíñ phủ ồng Phạm Minh Chính jờng rơ ồng Thẩm Hiểu Minh dơ̆ sơn rờp lòt còp Việt Nam tàm gơnoar broă Ƀí thư Tỉñ ủy Hải Nam.

Thủ tướng Cíñ phủ ồng Phạm Minh Chính đơs nền bơta kwơ màng bơh bơta gĭt gơ̆p lơgar lơh broă bal jŏ jòng tơl làm đah Việt Nam mờ Lo mờ sồr 2 gah lam lơh chul chồl lơh broă bal tàm ală gah broă, ngan là bơtàu tơnguh kă bro jat gùng dà ring bal, rề ơnàng lơh broă bal bơcri priă; sơlơ tìp mat lơh kwèng làng bol, lơh niam wơl lơh broă bal nhơl chờ... Bè lơh broă bal ală tiah, Thủ tướng Cíñ phủ ồng Phạm Minh Chính sồr càr Hải Nam sơlơ cribơyai bal, lơh broă bal mờ ală Ƀộ, ngàñ, ală tiah lơgar Việt Nam dê, tàm hơ̆ geh ƀòn dờng Hồ Chí Minh mờ càr Quảng Ninh; lơh pràn lơh broă bal geh kwơ bal bè nhơl chờ, tàm tơrbŏ bal gùng lòt, bơto bơtê, gah lơh sơnơm, tìp mat lơh kwèng niam chài rơ gơi; lơh broă bal rcang sơndră tam gơl trồ tiah, jòi dong kờl rềs àr tàm dà lềng, lơh lòt niam mờ làng bol lơh ka, pơgồp bơnah gàr niam ring lơngai, kơ̆ kơljap mờ lơh broă bal tàm dà lềng.