Tàm dơ̆ wă rò, Thủ tướng Cíñ phủ ồng Phạm Minh Chính đơs nền, Việt Nam sùm sền lơgar Nhờk là lơgar lơh broă bal pin dờn, kwơ màng lam lài mờ jŏ jòng. 2 gah pà gĭt bơta gĭt gơ̆p Lơh broă bal kwơ màng jrô ơnàng làm uă đah Việt Nam mờ Nhờk gam tàm tơngai bơtàu tơnguh niam bơnĕ, pràn kơl dang mờ lơh broă ngan ngồn tàm uă gah.

Thủ tướng Cíñ phủ ồng Phạm Minh Chính sồr 2 gah pơn jat tai bơt bơtàu bơta pin dờn cíñ trị bơh ală dơ̆ lòt còp, tìp mat cribơyai tàm kwang bàng kấp dờng kung bè kấp ƀộ, ngàñ; sơlơ tơnguh tàm tơrbŏ bal, lơh broă bal đah ală tiah, mpồl lơh sa kă bro; chồl tơnguh tìp mat lơh kwèng làng bol, tàm hơ̆ Nhờk sền sơ wì lơh ƀuơn sră nggal ai visa, wèt tus ờ duh pal geh visa ai làng bol Việt Nam in mut tàm lơgar Nhờk nàng chồl tơnguh lơh broă bal lòt nhơl, tìp mat lơh kwèng làng bol; lơh geh bơta ƀuơn ngan ai mpồl bơtiàn mờr 500 rơbô nă làng bol lơgar Việt Nam kis tàm lơgar Nhờk ơm kis, bơsram sră mờ lơh broă.