Thủ tướng Cíñ phủ ồng Phạm Minh Chính jờng rơ mờ đơs dơ̆ lòt còp dơ̆ 2 tus lơgar Việt Nam bơh ồng Jose Ramos Horta dê tàm gơnoar broă Kwang atbồ lơgar geh gơtha dờng ngan, lơh tềl gơl gùng rlau 20 nam lơh bơta git gơp cribơyai broă mờ lơgar ndai, pơgồp bơnah lơh kơ̆ kơljap bơta pin dờn cíñ trị mờ lơh gơlik bơta gơn kơnờm pa ai bơta git gơp 2 lơgar in tàm tơngai tus. Bàr nă kwang đơng lam bồ kung ring bal pal sơlơ tơnguh tai bơta pin dờn cíñ trị bơh cribơyai, tìp mat kwang bàng kâp dờng mờ ală kâp; lam lơh jat geh cồng nha ală jơnau ring bal kâp dờng; pơn jat tai sơlơ lơh sir tơngume adat boh lam ai lơh broă bal 2 gah in; ngui geh cồng nha ală bơta pràn lơh broă bal dờng màng đah 2 lơgar.

Thủ tướng Cíñ phủ sồr 2 gah mhar tơn jŏ tai tơngai halà kĭ pa sră cih kah bè kă bro phe, pơgồp bơnah gàr tơl kòi phe; hòi jà Timor Leste sơlơ tơnguh tai blơi ală phan Việt Nam dipal. Bàr gah kung hơ pơrgon pơn jat tai kờñ nùs nhơm pal jat bơh ASEAN dê bè dà lềng đah mat tơngai lik kung bè ală broă lơh ngan gàr sùm ring lơngai, kơ̆ kơljap, lơngăp lơngai mờ khat gơboh gùng dà lềng, gùng rơndeh par tàm dà lềng đah mat tơngai lik, tă pơgồp tàm broă gàr sùm ring lơngăi, kơ̆ kơljap mờ bơtàu tơnguh tàm tiah do.