Tàm dơ̆ wă rò, Thủ tướng Cíñ phủ ồng Phạm Minh Chính đơs nền dơ̆ lòt còp bơh ồng Prak Sokhonn dê geh gơtha kwơmàng ngan, pơgồp bơnah lơh kơ̆ kơl jăp mờ sơlơ tơnguh tai gĭt gơ̆p đah 2 Đảng, 2 Dà lơgar.

Bàr nă kwang đơng lam bồ dùl nùs bal đơs là, Việt Nam mờ Campuchia là 2 lơgar ơm rềp bal, neh sùm bal mờ gơ̆p tam klăc bal tam dră wơl mờ bol sò tơm nàng dong klàs jơi bơtiàn, tơrgùm dùl dà lơgar kung bè tàm broă lơh bơ̆t bơtàu mờ sền gàr dà lơgar; gĭt gơ̆p đềt mềr, tam klăc bal, lơh broă bal, dong kờl bal mờ gơ̆p đah 2 Đảng, 2 Dà lơgar mờ Làng bol 2 lơgar là jơnau ờ gơtùi pleh klàs, jơnau kwơmàng khà dùl gơ wèt mờ lơngăp lơngai, bơtàu tơnguh bơh tơl lơgar dê. Bàr gah đơs nền, gĭt gơ̆p 2 gah neh pơgồp bơnah kwơmàng tàm broă gàr kơ̆ cíñ trị, sền gàr niam dà lơgar mờ lơngăp lơngai, bơtàu tơnguh lơh sa- mpồl bơtiàn mờ tơnguh uă gơnoar broă pin dờn bơh tơl Đảng, tơl lơgar dê; pin dờn gĭt gơ̆p lơgar ơm rềp bal niam bơnĕ, lơh bơyô bal ờs mờng bơh yau, lơh broă bal tơl ală bơta, kơ̆ kơl jăp jŏ jòng đah Việt Nam mờ Campuchia rơ̆p ngai sơlơ geh lơh kơ̆ kơl jăp mờ bơtàu tơnguh pràn kơldang, tài bơta kwơ bơh làng bol 2 lơgar dê.