Dơ̆ pơrjum geh bơyai lơh pờ tơlik tơn tàm internet jơh gùt lơgar tàm anih tàm tơrbŏ hìu duh broă Cíñ phủ dê mờ anih tàm tơrbŏ hìu duh broă ală Ƀộ, anih lơh broă ndrờm pal mờ Ƀộ, anih lơh broă gơ wèt Cíñ phủ, Ủy ƀan Ñân zân ală càr, ƀòn dờng gơ wèt Dà lơgar. Nam 2023, tam gơl sồ dà lơgar geh lơh pràn jơh gùt làng bol, tơl làm, geh cồng nha dipal ngan tàm rài kis, tă pơgồp uă ngan tàm bơtàu tơnguh lơh sa- mpồl bơtiàn bơh dà lơgar dê. Nam Ală jơnau yal tơngĭt sồ dà lơgar, bol he neh lơh geh ală bơnàng jă tờm tàm broă lơh mòn mờ tam pà ală jơnau yal tơngĭt tàm anih lơh broă dà lơgar, lơh geh bơnàng jă ai bơtàu tơnguh jơh bal 3 broă tờm in là Cíñ phủ sồ, lơh sa sồ, mpồl bơtiàn sồ. Sơñio khà Tam gơl pa bơceh lơh lơgar Việt Nam dê nam 2023 ơm dơ̆ 46 tàm 132 lơgar, gơguh 2 khà pơndrờm mờ nam 2022.

Đơs tàm dơ̆ pơrjum, Thủ tướng Cíñ phủ Phạm Minh Chính đơs nền, tam gơl sồ dà lơgar nam 2023 geh lơh pràn jăt gùng dà jơh gùt làng bol, tơl làm, dipal mờ bơta geh ngan tàm rài kis, tă pơgồp uă ngan tàm bơtàu tơnguh lơh sa- mpồl bơtiàn dà lơgar dê, bal mờ 6 cồng nha tờm. Thủ tướng sồr kơlôi sơnơng jrô nùs nhơm tàm broă lơh tam gơl sồ: Pal sùm geh bồ tơngoh kơlôi sơnơng tam gơl pa, bồ tơngoh pal wă wờng loh, lơh ngan jơh nùs pal uă, lơh ngan pơnđơl pràn pal uă, lơh broă pal kràñ cê jơh nùs bal mờ broă lơh jak chài, geh cồng nha. Bơtàu tơnguh lơh sa sồ dồ bă jơh ală bơta, tơl làm mơya pal ai lài bơta niam rlau mờ jăt khà gời.