Do là dơ̆ lòt lơh broă kwơmàng, uă jơnau gơtha bơh Thủ tướng dê, tàm tŭ dờng màng ngan: Việt Nam mờ Nhờk tơnguh kâp gĭt gơ̆p gơguh tus Tam klăc lơh broă bal Jŏ jòng tơl làm tài ring lơngai mờ bơtàu tơnguh sùm tàm tiah câu Á mờ tàm dunia di dơ̆ lòt còp lơgar Nhờk bơh Củ tịc lơgar Võ Văn Thưởng dê tàm nhai 11 pa do; mờ Asean bal mờ Nhờk kung ngan ngồn lơh gĭt gơ̆p Tam klăc lơh broă bal Jŏ jòng tơl làm (CSP) tàm Pơrjum Kwang bàng kâp dờng Asean mờ lơgar Nhờk dơ̆ 26 tàm lơgar Indonesia tàm nhai 09 nam 2023.

Di tòm rlau, jơh bal lơgar Việt Nam mờ Asean ndrờm lơh gĭt gơ̆p cribơyai broă mờ lơgar ndai mờ lơgar Nhờk tàm nam 1973- pơgăp mờ do di nggùl rài. Digơlan ală kwang bàng đơng lam bồ Asean mờ lơgar Nhờk rơ̆p sền swì wơl ală broă lơh broă bal 50 nam do, bơh hơ̆ geh broă rơndăp lơh mờ pơlam gùng bơtàu tơnguh gĭt gơ̆p tàm tŭ tơngai pa. Mờ pơrjum do kung rơ̆p ring bal 2 sră nggal, geh: Jơnau yal bơr bơta wèt sền bè gĭt gơ̆p lơh bơyô bal mờ lơh broă bal đah Asean mờ lơgar Nhờk: Tam klăc lơh broă bal pin dờn mờ Broă rơndăp lơh lam lơh jăt Jơnau yal bơr bè bơta wèt sền bè gĭt gơ̆p lơh bơyô bal mờ lơh broă bal đah Asean mờ lơgar Nhờk: Tam klăc lơh broă bal pin dờn; nàng kờñ lơh jăt loh làng ală cồng nha cribơyai bơh ală kwang đơng lam bồ dê tàm dơ̆ pơrjum.