Lòt Pơrjum geh Thủ tướng, Kwang ătbồ mpồl ală lơgar: Campuchia, Lào, Myanmar, Thái Lan, Lo mờ Việt Nam. Thủ tướng Cíñ phủ Việt Nam Phạm Minh Chính neh geh jơnau cih đơs kwơmàng tàm Pơrjum. Pơrjum tơrgùm sền wơl cồng nha lơh broă bal Mekong- Lan Thương tàm 03 nam do mờ cribơyai gùng dà broă lơh ai tơngai tus in. Ală kwang đơng lam bồ đơs sùm ală tă pơgồp kwơmàng bơh MLC dê gơwèt mờ ring lơngai, lơh broă bal mờ bơtàu tơnguh tàm tiah dềt Mekong mờ kơnhoàl ù tiah do, mơkung đơs nền pơn jăt tai pơgồp bal niam, bal mờ gơ̆p bơ̆t bơtàu Mpồl bơtiàn tam pà bal rài tơnơ̆ do ring lơngai, bơtàu tơnguh sùm đah ală lơgar tàm tiah Mekong- Lan Thương.

Bè pơlam gùng dà lơh broă bal tàm tơngai tus in, ală kwang đơng lam bồ đơs sùm jơnau đơs ai lài bơtàu tơnguh, ai làng bol lơh tờm, bơnĕ bơnài bal đah kòn bơnus mờ brê bơnơm. Pơrjum ring bal lơh pràn lơh broă bal bal mờ gơ̆p bơ̆t bơtàu gùng glòm đah bơdìh anih tờm bơtàu tơnguh lơh sa Mekong- Lan Thương; kơlôi sơnơng jơnau tơl pràn lơh dơ̆ pơrjum, pơgồp bal broă dong kờl, lam lơh rơndăp broă lơh nàng lơh geh Gùng gah kềng Tam gơl pa bơceh lơh Mekong- Lan Thương. Đơs tàm Pơrjum, Thủ tướng Cíñ phủ Phạm Minh Chính đơs sùm, Cíñ phủ Việt Nam sùm sền gròi mờ rơ̆p pơn jăt tai bal mờ lơgar Lo mờ ală lơgar tàm tiah Mekong dong kờl lơh broă bal Mekong- Lan Thương ngai sơlơ bơtàu tơnguh pràn kơldang, geh cồng nha mờ kơ̆ kơl jăp jŏ jòng.