Tàm dơ̆ tìp mat, Thủ tướng Cíñ phủ Phạm Minh Chính neh yal mờ Kwang atbồ lơgar Hungary Katalin Novak bè ală cồng nha kwơ màng mờ 2 gah neh lơh geh tàm dơ̆ pơrjum đah 2 Thủ tướng dê, tàm hơ̆ geh ală gùng dà pơlam dờng nàng kờñ sơlơ tơnguh bơta gĭt gơ̆p lơh bơyô bal bơh yau mờ lơgar lơh broă bal tơl làm đah Việt Nam mờ Hungary tàm tơl gah broă.

Bè cíñ trị- cribơyai broă mờ lơgar ndai, Thủ tướng Phạm Minh Chính sồr 2 gah pơn jat tai sơlơ tơnguh tìp mat mờ tam pơgơl mpồl kwang bàng ală kấp, ngan là kwang bàng kấp dờng, kung bè đah ală Ƀộ, ngàñ, ală tiah nàng kờñ tơnguh tai bơta pin dờn cíñ trị mờ gĭt wă bal mờ gơ̆p, lơh bơnàng jă nàng chul chồl mờ rề ơnàng lơh broă bal đah 2 gah tàm tơl ală bơta. Bè lơh broă bal tàm ală dơ̆ cribơyai dunia, Thủ tướng Phạm Minh Chính mờ Kwang atbồ lơgar Hungary Katalin Novak ring bal pơn jat tai gàr sùm dơ̆ tìp mat kềng gah ală dơ̆ cribơyai uă lơgar, pơgồp bal niam, dong kờl bal mờ gơ̆p tàm ală mpồl dunia, ngan là Liên hợp quôk ASEM, gùng dà broă lơh ASEAN-EU nàng kờñ tă pơgồp ai bơta ring lơngăi kơ̆ kơl jăp, lơh broă bal mờ bơtàu tơnguh tàm tiah do mờ tàm dunia.