Tŭ do, lơgar Việt Nam geh mờr 910 rbô mpồl lơh sa kă bro gam lơh broă uă rlau 3 dơ̆ pơndrờm mờ nam 2011, pơgăp 14 rbô 400 hợp tak xã mờ rlau 5 tơlak hìu lơh sa kă bro, đah mpồl lơh sa kă bro tă pơgồp rlau 60% GDP, pơgăp 30% kờp jơh khà cau lơh broă gam lơh broă. Ală mpồl lơh sa kă bro, cau lơh sa kă bro geh mat tàm jơh ală gah broă lơh, gah lơh sa, kă bro, lơh broă ờ mìng tàm lơgar mờ uă mpồl lơh sa kă bro, cau lơh sa kă bro neh lơh geh bơta tiơng pơnrơ, đơs nền bơta kwơ măt kă bro geh pơneh tus kơnhoàl ù tiah do mờ tàm dunia.

Đơs tàm dơ̆ bơyai lơh, ala măt Cíñ phủ, Thủ tướng jờng rơ, cih dờp mờ đơs niam ngan ală tă pơgồp kwơmàng bơh cau lơh sa kă bro, mpồl lơh sa kă bro kơnòm să lơgar Việt Nam dê tàm broă lơh bơ̆t bơtàu mờ bơtàu tơnguh dà lơgar. Mơkung jờng rơ mờ cih dờp Mpồl Lơh sa kă bro kơnòm să Việt Nam neh tam klăc, đơng lam, tề lam srơh Cau lơh sa kă bro kơnòm să Việt Nam tàm 30 nam do. Thủ tướng đơs sùm, Cíñ phủ sùm wă wờng, tam pà bal, iăt kơno mờ rơ̆p pơn jăt tai geh ală broă lơh dong kờl nàng mpồl cau lơh sa kă bro in sơrlèt gan kal ke, bơtàu tơnguh rlau tai kung bè pơn jăt tai lòt bal, dong kờl bal nàng Mpồl Cau lơh sa kă bro kơnòm să Việt Nam pơn jăt tai bơtàu tơnguh pràn kơldang.