Tàm pơrjum, 2 Thủ tướng neh cribơyai tơl làm bè bơta bơtàu tơnguh lơh sa- mpồl bơtiàn bơh tơl lơgar dê, ală broă lơh sơlơ tơnguh bơta git gơp 2 gah mờ ală broă dunia, ală lơgar rềp bal jơh bal 2 gah sền gròi. Thủ tướng lơgar Hà Lan jờng rơ ngan ală cồng nha niam bơh Việt Nam dê tàm broă bơtàu tơnguh wơl mờ bơtàu tơnguh lơh sa mpồl bơtiàn tơnơ̆ kòp dờng Kovid-19 mờ kờp bơh dơ̆ lòt còp nam 2019 ồng dê.

Bàr nă kwang đơng lam bồ jờng rơ bơta lơh ngan bơh jơh bal 2 gah dê tàm broă lơh jat ngan ngồn ală jơnau hơ pơrgon mờ jơnau ring bal lơh broă bal neh geh kĭ. Bàr Thủ tướng ring bal sơlơ tơnguh pin dờn cíñ trị bơh broă tàm pơ gơl cribơyai kwang bàng kâp dờng, pơn jat tai lam lơh geh cồng nha ală gùng dà broă lơh mờ jơnau ring bal lơh broă bal 2 gah, mờ kung kơlôi sơnơng lơh ală gùng dà broă lơh pa, nàng kờñ lơh niam rlau tai lơh broă bal gah broă ờs mờng đah 2 lơgar; đơs nền lơh sa- kă bro là gah tờm ngan tàm git gơp đah 2 lơgar, ring bal pơn jat tai lơh jat tơl làm, geh cồng nha Hiệp địñ kă bro khat gơboh đah Việt Nam mờ EU (EVFTA). Bàr nă kwang đơng lam bồ ring bal pơn jat tai sơlơ tơnguh bơta lơh broă bal jŏ jòng bè gơ dờp mờ tam gơl trồ tiah, sền gàr dà, lơh sa suơn sre kơ̆ kơljap, pơgồp bơnah at tê bal rơcang sơndră mờ ală bơta lòng gùt plai ù. Tơnơ̆ pơrjum, bàr Thủ tướng neh sền dơ̆ jàu 4 sră nggal lơh broă bal đah ală ƀộ, gah broă lơh, mpồl tam klac 2 lơgar tàm ală gah jòi sền mờ tơnhàu kơ̆ kơljap ală phan kuơ tàm ù dờng màng, sền gròi dia phan lik mờ mut tàm lơgar, bơcri priă, kă bro.