Tàm pơrjum cri bơyai, bàr gah neh cri bơyai song dơ pă, tàm nùs nhơm bơ̆t bơtàu, tam pà bal broă bồ tơngoh kơlôi sơnơng, bơceh lơh pràn, ală broă lơh nàng tơnguh broă bơcri priă, kă bro đah lơgar Việt Nam, lơh pràn bơta git gơ̆p lơh broă bal lơh sa bơcri priă đah bàr lơgar.

Thủ tướng Cíñ phủ ồng Phạm Minh Chính đơs niam mờ ưn ngài ală jơnau tam pà bal song dơ pă, jơh nùs bơh ală mpồl lơh sa kă bro lơgar Hàn Quốk bè bơta kă bro tàm lơgar Việt Nam mờ hơ geh bơcri priă tàm lơgar Việt Nam tàm ală gah broă pa. Do là cơng tàng loh làng ai broă lòt bal, pin dờn, git wă bal mờ tam pà bal bơh ală mpồl lơh sa kă bro lơgar Hàn Quốk gơwèt mờ lơgar Việt Nam tàm nùs nhơm geh kwơ ndrờm bal, rềs àr tam pà, lơh ngan sơrlèt kal ke nàng tơnguh bơtàu. Tàm bơta dunia tam gơl mhar, kal ke, ờ git lài, lơgar Việt Nam pơn jờng ngan broă tus bal pràn bơh ală cau bơcri priă lơgar bơdìh, tàm hơ̆ uă ngan là ală mpồl lơh sa kă bro tus bơh lơgar Hàn Quốk.