Dờp jơnau jà bơh Thủ tướng lơgar Singapore ồng Lý Hiển Long mờ Bơtau lơgar Brunei Darussalam ồng Haji Hassanal Bolkiah dê, Thủ tướng Cíñ phủ ồng Phạm Minh Chính bal mờ pơ-ùr mờ mpồl kwang bàng kấp dờng lơgar CHXHCN Việt Nam geh tus còp mùl màl lơgar Singapore mờ lơgar Brunei Darussalam bơh ngai 08 tus ngai 11 nhai 02 nam 2023.

Dơ̆ tus còp do sơlơ geh kwơ màng rơlao tŭ do là broă lơh sơnrờp ngan tàm ală broă lơh geh bơyai lơh tàm ală lơgar di tơnkah 50 nam crơng gơs bơta git gơ̆p lơh broă bal mờ lơgar ndai mờ 10 nam crơng gơs bơta git gơ̆p lơh broă bal jŏ jòng. Tàm dơ̆ tus còp do, Thủ tướng ală lơgar geh cri bơyai ală broă lơh nàng lơh mùl màl jơh ală jơnau ring bal bơh kwang đơng lam kấp dờng mờ jòi geh ală gùng dà broă lơh bal pa tàm tơngai tus. Tàm 10 nam pa do tŭ lơgar Việt Nam mờ lơgar Singapore kĭ bơta git gơ̆p lơh broă bal jŏ jòng, bàr lơgar neh lơh broă bal tơl ală bơta tàm ală gah broă, bơh cíñ trị, lơh broă bal mờ lơgar ndai, sền gàr dà lơgar, bơta lơngăp lơngai tus mờ broă tìp bal làng bol.