Lài mờ hơ̆, tàm drim òr (09/02) jăt jơ tàm tiah do, Thủ tướng Cíñ phủ ồng Phạm Minh Chính bal mờ pơ-ùr neh tus pơdơng bơkào tàm Anih kah kơlôi Củ tịc Hồ Chí Minh tàm Ƀảo tàng ală bơta gơguh jăk chài câu Á mờ còp Brê tam chi che lơgar Singapore.

Ƀảo tàng ală bơta gơguh jăk câu Á geh lơh tềng gah dà dờng Singapore, là ƀảo tàng mìng geh lơh tàm tiah geh ai is nàng tus jòi sền phan lời wơl niam chài Câu Á dê; ai geh broă pơgồp bal rài lài do đah ală bơta chài rơgơi bơh Câu Á mờ đah Câu Á mờ dunia. Tàm ù tiah dờng ơnàng bơh Ƀảo tàng dê, bal mờ Củ tịc Hồ Chí Minh mờ uă kwang đơng lam, cau jăk chài câu Á ndai geh ơn niam. Thủ tướng Cíñ phủ, Pơ-ùr bal mờ mpồl kwang bàng lơh broă neh pơdơng bơkào, kah kơlôi tus mờ broă lơh dờng màng bơh Củ tịc Hồ Chí Minh dê, Cau khin cha jăk chài tơnklàs dà lơgar, cau chài rơgơi dunia dê.