Tàm broă tus còp mùl màl lơgar Singapore, drim òr (10/02), Thủ tướng Cíñ phủ ồng Phạm Minh Chính neh tus Pơrjum cri bơyai mpồl lơh sa kă bro lơgar Việt Nam mờ lơgar Singapore mờ broă tus bal bơh kwang đơng lam ală Ƀộ, anih lơh broă gơwèt Cíñ phủ, ală mpồl lơh broă bal mờ gal mpồl lơh sa kă bro bàr lơgar.

Tàm pơrjum cri bơyai, ală kwang bàng đơs tờm bơta git gơ̆p Lơh broă bal jŏ jòng đah lơgar Việt Nam mờ lơgar Singapore tơnguh bơtàu pràn kơl dang tàm ală gah broă. Nam 2023 do, bàr lơgar tơnkah 50 nam crơng gơs bơta git gơ̆p lơh broă bal mờ lơgar ndai mờ 10 nam crơng gơs broă lơh bal jŏ jòng. Đơs tàm Pơrjum cri bơyai, Thủ tướng Cíñ phủ ồng Phạm Minh Chính pà git, nam 2023, lơgar Việt Nam mờ lơgar Singapore tơnkah 50 nam crơng gơs bơta git gơ̆p lơh broă bal mờ lơgar ndai, 10 nam crơng gơs bơta git gơ̆p Lơh broă bal jŏ jòng đah lơgar Việt Nam mờ lơgar Singapore, 100 nam ngai deh ƀồc Thủ tướng lơgar Singapore lài do ồng Lý Quang Diệu. Bơh 50 nam git gơ̆p, lơh broă bal, bàr lơgar Việt Nam mờ Singapore wă rơlao tai, pin dờn rơlao tai; ală bơta, tơl, mùl màl mờ geh cồng nha rơlao; là tơngu me tờm kwơ màng nàng lơh pràn broă lơh bal, wèt tus lơh ală bơta pa tàm bơta git gơ̆p đah bàr lơgar; pơgồp bal tàm bơta ring lơngai, kơl jăp, lơh broă bal, tơnguh bơtàu tàm tiah do mờ tàm dunia.