Yal mờ Kwang đơng lam bồ dờng Ling klàng dà lơgar Campuchia in bè gùng dà lơh broă mờ lơgar ndai mờ broă lơh sền gàr dà lơgar ‘4 ờ” bơh Việt Nam dê, Thủ tướng ồng Phạm Minh Chính đơs nền, Việt Nam sùm sền dờng màng mờ lời ai bơta sền gròi lài ngan ai broă ngai sơlơ lơh kơ̆ kơljap mờ bơtàu tơnguh bơta git gơp lơgar rềp bal niam bơnĕ, lơh bơyô bal ờs mờng, lơh broă bal tơl làm, kơ̆ kơljap jŏ jòng sùm mờ Campuchia; sùm kờñ tò dong dùl Campuchia lơngăp lơngai is, lơh tờm is, ring lơngai, bơtàu tơnguh sùm mờ ngai sơlơ geh gơnoar broă dờng màng rlau tàm muh mat dunia.

Kwang atbồ Cíñ phủ Việt Nam kơp kờñ ling klàng 2 lơgar pal lam lài tàm broă sền gàr, bơt bơtàu bơta git gơp niam bơnĕ đah Việt Nam mờ Campuchia. Tàm hơ̆ geh bơto bơtê cau lơh broă; pơn jat tai sơlơ tơnguh tai broă tàm yal jơnau tơnggit, cribơyai broă gơlik geh; sơlo bơto bơtê bơhiàn tam klac bal bơh ling klàng mờ làng bol 2 lơgar dê; bơsong geh cồng nha ală broă gam ờ niam mờ gơlik geh bơh kâp hơ đơm. Kơryan bơta tam cah ờ rờm git gơp tam klac bal đah Việt Nam- Campuchia mờ Lào.