Thủ tướng Cíñ phủ Phạm Minh Chính tơlik nùs nhơm pơlai soh ngan mờ geh jơnau tam pà bal jơnau moăt jrùng uă ngan tềng đăp mờ bơta chơ̆t ni sơna bơh ƀồc Thủ tướng Abe dê, cau bơyô dờng, đềt mềr bơh Cíñ phủ, làng bol lơgar Việt Nam dê. Thủ tướng Cíñ phủ Phạm Minh Chính đơs niam bơta git gơ̆p đah lơgar Việt Nam mờ lơgar Nhờk tàm rài ƀồc ồng Abe at gơnoar broă Thủ tướng neh geh ală broă bơtàu tơnguh pràn kơl dang tŭ bàr lơgar tơnguh bơta git gơ̆p tus Tam klăc bal jŏ jòng jrô ơnàng tài bơta ring lơngai mờ ndrờm bal tàm câu Á nam 2014, mpồl cau lơgar Việt Nam kis tàm lơgar Nhờk gơguh mhar, geh rơlao 400 rơbô nă.

Mò Akie Abe, pơ-ùr ƀồc Thủ tướng Abe ưn ngài mờ tam pà bal jơnau pơlai uă ngan bơh Thủ tướng Cíñ phủ Phạm Minh Chính dê gơwèt mờ bơta chơ̆t bơh ƀồc Thủ tướng Shinzo Abe; pin nền geh pơn jăt tai lơh jăt jơnau lời wơl bơh ƀồc Thủ tướng Abe neh đơs bè broă lơh jăt nền nòn rơlao bơta git gơ̆p lơh broă bal, lơh bơyô bal đah lơgar Việt Nam mờ lơgar Nhờk.